വരുംദിവസങ്ങളില് മഴക്ക് സാധ്യത
മസ്കത്ത്: ഒമാനിലെ വിവിധ ഗവര്ണറേറ്റുകളില് അടുത്ത ദിവസങ്ങളില് മഴക്ക് സാധ്യതയുണ്ടെന്ന് നാഷണല് മള്ട്ടി ഹസാര്ഡ് ഏര്ളി വാണിങ് സെന്ററും ഡയറക്ടര് ജനറല് ഓഫ് മെറ്റിയൊറോളജിയും അറിയിച്ചു.അറബിക്കടലില് ഉഷ്ണമേഖലാ ന്യൂനമര്ദ്ദം രൂപപ്പെട്ടതിനെ തുടര്ന്നാണിത്. തെക്കന് ശര്ഖിയ ഗവര്ണറേറ്റിലെ റാസല് ഹദ്ദില് നിന്ന് 600 കിലോമീറ്റര് അകലെയാണ് ഇതിന്റെ കേന്ദ്രസ്ഥാനം. വടക്കുപടിഞ്ഞാറന് ദിശയിലൂടെ പാകിസ്താന് തീരത്തേക്ക നീങ്ങുന്ന ഉഷ്ണമേഖല ന്യൂനമര്ദം ഒമാന് തീരത്തേക്ക് വരാനുള്ള സാധ്യതയുമുണ്ട്. ഇതിന്റെ ഭാഗമായി ശനി, ഞായര്, തിങ്കള് ദിവസങ്ങളിലും തുടര്ന്നും ഒറ്റപ്പെട്ടതും ശക്തമായതുമായ മഴക്ക് സാധ്യതയുണ്ടെന്ന് അധികൃതര് അറിയിച്ചു.ശനി, ഞായര് ദിവസങ്ങളില് തെക്കന് ശര്ഖിയ ഗവര്ണറേറ്റിലെ റാസല് ഹദ്ദിനും അല് വുസ്ത ഗവര്ണറേറ്റിലെ റാസ് മദ്റഖക്കും ഇടയിലും ഹജര് മലനിരകളിലും ശക്തമായ മഴക്ക് സാധ്യതയുണ്ട്. അല് ദാഖിലിയ, തെക്കന് ശര്ഖിയ, വടക്കന് ശര്ഖിയ, മസ്കത്ത്, തെക്കന് ബാതിന, അല് ദാഹിറ എന്നീ ഗവര്ണറേറ്റുകളുടെ വിവിധ ഭാഗങ്ങളിലും മഴ പെയ്യും. അല് വുസ്ത, ദോഫാര് ഗവര്ണറേറ്റുകളിലെ മരുഭൂപ്രദേശത്തും മഴ പെയ്യും. 15 മുതല് 60 മില്ലിമീറ്റര് വരെ മഴ പെയ്യുമെന്നാണ് അറിയിപ്പിലുള്ളത്.