ചെന്നൈ: തമിഴ്നാട് നിയമസഭ ഓണ്ലൈന് ചൂതാട്ട നിരോധന ബില് പാസാക്കി. ഈ ബില് നിയമമാകുന്നതോടെ ചൂതാട്ട വിഭാഗത്തില് പെടുന്ന എല്ലാ ഓണ്ലൈന് ഗെയിമുകളും തമിഴ്നാട്ടില് നിയമവിരുദ്ധമാകും. കഴിഞ്ഞ വര്ഷം സെപ്റ്റംബര് 26ന് മന്ത്രിസഭ പാസാക്കി ഒക്ടോബര് ഒന്നിന് ഗവര്ണര് ഒപ്പിട്ട ഓണ്ലൈന് ചൂതാട്ട നിരോധന ഓര്ഡിനന്സിന് പകരമാണ് പുതിയ നിയമം.
ഓണ്ലൈന് റമ്മി ഉള്പ്പെടെ ചൂതാട്ടത്തിന്റെ ഏതെങ്കിലും തരത്തിലുള്ള പരസ്യവും പ്രചാരണവും നിയമവിരുദ്ധമായിരിക്കും. ചൂതാട്ടക്കാര്ക്കും കളിക്കാര്ക്കും മൂന്ന് വര്ഷം വരെ തടവ് ശിക്ഷ ലഭിക്കണമെന്നാണ് നിയമം ശുപാര്ശ ചെയ്യുന്നത്. ഇത്തരം ഗെയിമിംഗ് സൈറ്റുകളിലേക്കും ആപ്ലിക്കേഷനുകളിലേക്കും ബാങ്കുകളും ധനകാര്യ സ്ഥാപനങ്ങളും പണം കൈമാറരുതെന്നും നിയമം അനുശാസിക്കുന്നു.
ഓണ്ലൈന് റമ്മി ഉള്പ്പെടെ ചൂതാട്ടത്തിന് അടിമകളായതിനെ തുടര്ന്ന് യുവാക്കളും വിദ്യാര്ത്ഥികളുമടക്കം ഇരുപതിലധികം പേരാണ് തമിഴ്നാട്ടില് ആത്മഹത്യ ചെയ്തത്. ഈ സാഹചര്യത്തിലാണ് എം.കെ സ്റ്റാലിന്റെ നേതൃത്വത്തിലുള്ള ഡി.എം.കെ സര്ക്കാര് ഓണ്ലൈന് ചൂതാട്ട ഓര്ഡിനന്സിനെക്കുറിച്ച് ആലോചിച്ചത്.