കോട്ടയം ജില്ലയുടെ കിഴക്കന് മേഖലയായ മുണ്ടക്കയത്ത് വീണ്ടും കുറുനരി ആക്രമണം. പ്രദേശവാസിയായ ജോസൂട്ടി എന്നയാള്ക്കാണ് കുറുനരിയുടെ കടിയേറ്റത്. കൈകളിലും കാലിനും പരിക്കേറ്റ ഇയാളെ കോട്ടയം മെഡിക്കല് കോളേജ് ആശുപത്രിയില് പ്രവേശിപ്പിച്ചു.
രാവിലെ തോട്ടത്തില് കുരുമുളക് പറിക്കാനിറങ്ങിയപ്പോഴായിരുന്നു ആക്രമണം. ഏതാനും ദിവസങ്ങള്ക്ക് മുന്പ് മുണ്ടക്കയം ഗ്രാമപഞ്ചായത്ത് ഒന്നാം വാര്ഡ് അംഗമായ ജോമി തോമസിനും കുറുനരിയുടെ കടിയേറ്റിരുന്നു. പുലര്ച്ചെ റബ്ബര് വെട്ടനിറങ്ങിയപ്പോഴായിരുന്നു ജോമിയെ കുറുനരി ആക്രമിച്ചത്. കുറുനരിയ്ക്ക് പേവിഷബാധയേറ്റിട്ടുണ്ടാകാമെന്ന സംശയത്തില് ജോമി കോട്ടയം മെഡിക്കല് കോളേജിലെത്തി വാക്സിനെടുത്തിരുന്നു.
പ്രദേശത്ത് കുറുനരിയുടെ ആക്രമണം ആവര്ത്തിച്ച സാഹചര്യത്തില് മുണ്ടക്കയം മേഖലയില് കര്ശന നിരീക്ഷണം ഏര്പ്പെടുത്തുമെന്ന് എരുമേലി ഫോറസ്റ്റ് റേഞ്ച് ഓഫീസര് അറിയിച്ചു.