![“Manju”](https://santhigirinews.org/wp-content/uploads/2020/04/YOUTUBE.jpg")
ന്യൂഡല്‍ഹി : രാഷ്ട്രം വിഭാവനചെയ്യുന്ന നാരീശാക്തീകരണത്തിനു വളരെയധികം സംഭാവനചെയ്തുകൊണ്ടിരിക്കുന്ന സ്ഥാപനമാണ് ശാന്തിഗിരിയെന്ന് ഡല്‍ഹി ലഫ്.ഗവര്‍ണര്‍ വിനയ് കുമാര്‍ സക്‌സേന. മേക്ക് ഇന്‍ ഇന്ത്യ എന്ന പ്രധാനമന്ത്രിയുടെ വികസനകാഴ്ച്ചപ്പാടിനൊപ്പംചേര്‍ന്നു നിന്നുകൊണ്ട് നിരവധി യുവാക്കള്‍ക്ക് സ്കിൽ ഡവലപ്‌മെന്റ് വികാസ പ്രവര്‍ത്തനത്തിലൂടെ പുതിയ ജീവിതപാത ഒരുക്കാനും ശാന്തിഗിരി പ്രവര്‍ത്തിച്ചുകൊണ്ടിരിക്കുകയാണെന്നും അദ്ദേഹം പറഞ്ഞു. ഡല്‍ഹിയില്‍ സാകേതില്‍ പ്രവര്‍ത്തിക്കുന്ന ശാന്തിഗിരി ആശ്രമത്തിന്റെ സില്‍വര്‍ ജൂബിലി ആഘോഷങ്ങളുടെ ഉദ്ഘാടനം നിര്‍വഹിക്കുകയായിരുന്നു ഡല്‍ഹി ലഫ്.ഗവര്‍ണര്‍. യോഗത്തില്‍ കേന്ദ്ര വിദേശകാര്യ വകുപ്പ് സഹമന്ത്രി വി.മുരളീധരന്‍ അദ്ധ്യക്ഷത വഹിച്ചു. കേരളത്തില്‍ പുണ്യമാസമായികണക്കാക്കുന്ന വൃശ്ചികമാസമായ കാര്‍ത്തിക മാസത്തിന്റെ പുണ്യതയില്‍ ശാന്തിഗിരിയില്‍ പ്രാണപ്രതിഷ്ടനടക്കുന്നത് നമ്മുടെ സനാതനധര്‍മ്മത്തിന് കൂടൂതല്‍ കരുത്ത് പകരുന്നതാണെന്ന് അദ്ദേഹം പറഞ്ഞു. യോഗത്തില്‍ ആശ്രമം ജനറല്‍സെക്രട്ടറി സ്വാമി ഗുരുരത്‌നം ജ്ഞാനതപസ്വിയും ഡല്‍ഹി ആശ്രമം ചീഫ് ജനനി പൂജാ ജ്ഞാനതപസ്വിയും ചേര്‍ന്ന് ഗവര്‍ണ്ണര്‍ക്ക് ഉപഹാരം നല്‍കി.
ആശ്രമം പ്രസിഡന്റ് സ്വാമി ചൈതന്യ ജ്ഞാനതപസ്വി, ജനറല്‍ സെക്രട്ടറി സ്വാമി ഗുരുരത്‌നം ജ്ഞാനതപസ്വി എന്നിവര്‍ മഹനീയ സാന്നിദ്ധ്യമായി. നോയിഡ ഫിലിം സിറ്റി സിനിമ ടെലിവിഷന്‍ അക്കാദമി പ്രസിഡന്റ് സന്ദീപ് മാര്‍വ, ആള്‍ ഇന്ത്യ മലയാളി അസോസിയേഷന്‍ ദേശീയ അദ്ധ്യക്ഷന്‍ ബാബു പണിക്കര്‍, ഒമാനിലെ മിഡില്‍ ഈസ്റ്റ് യൂണിവേഴ്‌സിറ്റി ഡീന്‍ ഡോ.ജി.ആര്‍. കിരണ്‍, ഫ്‌ളാഗ് കമ്മ്യൂണിക്കേഷന്‍ പ്രൈവറ്റ് ലിമിറ്റഡ് മാനേജിംഗ് ഡയറക്ടറും രാഷ്ട്രീയ നിരീക്ഷകനുമായ ദീപു നമ്പ്യാര്‍, സിന്ദൂരം ചാരിറ്റീസ് ചെയര്‍മാന്‍ സബീര്‍ തിരുമല, ഡല്‍ഹി മലയാളി അസോസിയേഷന്‍ പ്രസിഡന്റ് രഘുനാഥ് കെ., സാകേതിലെ ധര്‍മ്മശാസ്ത്രാ ക്ഷേത്രം ജനറല്‍ സെക്രട്ടറി എം.പി. സുരേഷ് എന്നിവര്‍ ആശംസയര്‍പ്പിച്ചു. ശാന്തിഗിരി ആശ്രമം ഗുരുധര്‍മ്മപ്രകാശ സഭാംഗമായ ഡല്‍ഹിയില്‍ നിന്നുള്ള ജനനി ശാലിനി ജ്ഞാന തപസ്വിനി സ്വാഗതവും ആശ്രമം ഉപദേശകസമിതിയിൽ കമ്മ്യൂണിക്കേഷന്‍സ് വിഭാഗം അഡ്വൈസർ രഞ്ജിത്ത് ദേവരാജ് നന്ദിയും രേഖപ്പെടുത്തി.
