വാഷിങ്ടണ്: മൂന്ന് ദിവസത്തെ അമേരിക്കന് സന്ദര്ശനത്തിന് പുറപ്പെട്ട പ്രധാനമന്ത്രി നരേന്ദ്ര മോദി വാഷിങ്ടണില്. ബുധനാഴ്ച ജോയിന്റ് ബേസ് ആന്ഡ്രൂസില് വിമാനം ഇറങ്ങിയ പ്രധാനമന്ത്രിയെ ഹാര്ദ്ദവമായി സ്വീകരിക്കാന് ഇന്ത്യന് അമേരിക്കന് പൗരന്മാരുടെ വലിയസംഘം കാത്തുനിന്നിരുന്നു. പ്രസിഡന്റ് ജോ ബൈഡനുമായുള്ള കൂടിക്കാഴ്ച, ക്വാഡ് ഉച്ചകോടി, ഐക്യരാഷ്ട്ര സംഘടനാ പൊതുസഭയെ അഭിസംബോധന ചെയ്യല് എന്നിവയാണ് മോദിയുടെ ത്രിദിന യു.എസ്. സന്ദര്ശനത്തിലുള്ളത്. ഇത് ആദ്യമായാണ് ജോ ബൈഡനും മോദിയും തമ്മില് കൂടിക്കാഴ്ച നടക്കുന്നത്.
യുഎസ് സര്ക്കാരിലെ ഉന്നത ഉദ്യോഗസ്ഥരും അമേരിക്കയിലെ ഇന്ത്യന് അംബാസഡര് തരണ്ജിത് സിങ് സന്ധു അടക്കമുള്ളവരും ചേര്ന്നാണ് മോദിയെ വിമാനത്താവളത്തില് സ്വീകരിച്ചത്. വാഷിങ്ടണിലെ ഇന്ത്യന് സമൂഹം നല്കിയ ഊഷ്മള സ്വീകരണത്തിന് നന്ദിയെന്ന്അദ്ദേഹം ട്വിറ്ററില് കുറിച്ചു. വ്യാഴാഴ്ച, ഓസ്ട്രേലിയന് പ്രധാനമന്ത്രി സ്കോട്ട് മോറിസണ്, യുഎസ് വൈസ് പ്രസിഡന്റ് കമലാ ഹാരിസ് എന്നിവരുമായി അദ്ദേഹം കൂടിക്കാഴ്ച നടത്തും. വ്യാഴാഴ്ച ഉച്ചയ്ക്കു ശേഷമാണ് മോദി-മോറിസണ് കൂടിക്കാഴ്ച നടക്കുക . അതെ സമയം വെള്ളിയാഴ്ചയാണ് മോദി-ബൈഡന് കൂടിക്കാഴ്ച. ഇതാദ്യമായാണ് ഇരു നേതാക്കളും തമ്മില് കൂടിക്കാഴ്ച നടക്കുന്നത്.
ഇന്ത്യയില് നിക്ഷേപം നടത്താന് താത്പര്യമുള്ള കോര്പറേറ്റ് കമ്ബനികളുടെ യു.എസിലെ മേധാവികളുമായും മോദി കൂടിക്കാഴ്ച നടത്തും. അഡോബ്, ക്വാല്കോം, ബ്ലാക്ക് സ്റ്റോണ്, ജനറല് അറ്റോമിക്സ്, ഫസ്റ്റ് സോളാര് തുടങ്ങിയവയുടെ സി.ഇ.ഒകള് മോദിയുമായുള്ള കൂടിക്കാഴ്ചയില് പങ്കെടുക്കും.