![“Manju”](https://santhigirinews.org/wp-content/uploads/2020/04/YOUTUBE.jpg")
പ്രജീഷ് വള്ള്യായി
കണ്ണൂർ ജില്ലയില്‍ ഒരാള്‍ക്കു കൂടി കോവിഡ് 19 സ്ഥിരീകരിച്ചതായി ജില്ലാ കലക്ടര്‍ ടി വി സുഭാഷ് അറിയിച്ചു. മൂര്യാട് സ്വദേശിയായ 25കാരനാണ് സമ്പര്‍ക്കത്തിലൂടെ രോഗബാധിതനായത്. മെയ് ഒന്നിന് അഞ്ചരക്കണ്ടി കോവിഡ് ട്രീറ്റ്മെന്റ് സെന്ററില്‍ ഇദ്ദേഹം സ്രവ പരിശോധനയ്ക്ക് വിധേയനായിരുന്നു. ഇതോടെ ജില്ലയില്‍ കൊറോണ ബാധിതരുടെ എണ്ണം 117 ആയി.
അതിനിടെ, വെള്ളി, ശനി ദിവസങ്ങളിലായി ജില്ലയിലെ വിവിധ ആശുപത്രികളില്‍ ചികില്‍സയിലായിരുന്ന 10 പേര്‍ കൂടി രോഗം ഭേദമായി ആശുപത്രി വിട്ടു. നാലു പേര്‍ വെള്ളിയാഴ്ചയും ആറു പേര്‍ ശനിയാഴ്ചയുമാണ് ഡിസ്ചാര്‍ജ് ആയത്.
അഞ്ചരക്കണ്ടി കോവിഡ് ട്രീറ്റ്മെന്റ് സെന്ററില്‍ ചികില്‍സയിലായിരുന്ന പന്ന്യന്നൂര്‍ സ്വദേശി 28കാരി, കൂടാളി സ്വദേശി 30കാരന്‍, കണ്ണൂര്‍ ഗവ. മെഡിക്കല്‍ കോളേജ് ആശുപത്രിയില്‍ ചികില്‍സയിലായിരുന്ന തായിനേരി സ്വദേശി 24 കാരന്‍, ചെറുവാഞ്ചേരി സ്വദേശി 21കാരി എന്നിവരാണ് വെള്ളിയാഴ്ച രോഗമുക്തരായത്.
അഞ്ചരക്കണ്ടി കോവിഡ് ട്രീറ്റ്മെന്റ് സെന്ററില്‍ നിന്ന് ചെറുവാഞ്ചേരി സ്വദേശി 13 കാരന്‍,
കണ്ണൂര്‍ ഗവ. മെഡിക്കല്‍ കോളേജില്‍ നിന്ന് നടുവില്‍ സ്വദേശിയായ 35കാരന്‍, അദ്ദേഹത്തിന്റെ 60കാരനായ അച്ഛന്‍, 59കാരിയായ അമ്മ, ജില്ലാ ആശുപത്രിയില്‍ നിന്ന് കുന്നോത്തുപറമ്പ് സ്വദേശി 27കാരന്‍, പാപ്പിനിശ്ശേരി സ്വദേശി 36കാരന്‍ എന്നിവര്‍ ഇന്നലെ ഡിസ്ചാര്‍ജ് ആയി. ഇതോടെ ജില്ലയില്‍ കോവിഡ് മുക്തരായി ആശുപത്രി വിട്ടവരുടെ എണ്ണം 81 ആയി. ബാക്കി 36 പേര്‍ വിവിധ ആശുപത്രികളില്‍ ചികില്‍സയിലാണ്.
ജില്ലയില്‍ നിലവില്‍ 51 പേര്‍ കണ്ണൂര്‍ ഗവ. മെഡിക്കല്‍ കോളേജിലും നാലു പേര്‍ കണ്ണൂര്‍ ജില്ലാ ആശുപത്രിയിലും ഒരാള്‍ തലശ്ശേരി ജനറല്‍ ആശുപത്രിയിലും 30 പേര്‍ അഞ്ചരക്കണ്ടി ജില്ലാ കോവിഡ് ചികിത്സാ കേന്ദ്രത്തിലും 2457 പേര്‍ വീടുകളിലുമായി നിരീക്ഷണത്തിലുണ്ട്. ഇതുവരെയായി ജില്ലയില്‍ നിന്നും 3803 സാമ്പിളുകള്‍ പരിശോധന യ്ക്കയച്ചതില്‍ 3562 എണ്ണത്തിന്റെ ഫലം ലഭ്യമായി. 241 എണ്ണത്തിന്റെ ഫലം ലഭിക്കാനുണ്ട്.
