കൊല്ലം ജില്ലയില്‍ ഇന്നലെ എട്ടു പേര്‍ക്ക് കോവിഡ്

സിന്ധുമോള്‍ ആര്‍

കൊല്ലം: ജില്ലയില്‍ ഇന്നലെ എട്ടു പേര്‍ക്ക് കോവിഡ് പോസിറ്റീവ് സ്ഥിരീകരിച്ചു. സമ്പര്‍ക്കം മൂലമുള്ള രോഗബാധയുമില്ല. രോഗം സ്ഥിരീകരിച്ച മൂന്നു പേര്‍ മോസ്‌കോയില്‍ നിന്നും മൂന്നുപേര്‍ നൈജീരിയയില്‍ നിന്നും ഒരാള്‍ ബഹ്‌റിനില്‍ നിന്നും ഒരാള്‍ മുംബൈയില്‍ നിന്നും എത്തിയവരാണ്.

കൊട്ടാരക്കര മൈലം ഇഞ്ചക്കാട് സ്വദേശിനി (20), പത്തനാപുരം നടുക്കുന്ന് സ്വദേശിനി (20), കരുനാഗപ്പള്ളി തഴവ മണപ്പള്ളി സ്വദേശി (20) എന്നിവര്‍ മോസ്‌കോയില്‍ നിന്നും എ ഐ-1946 ഫ്‌ളൈറ്റില്‍ ജൂണ്‍ ഒന്നിന് കണ്ണൂരിലെത്തി. മൂന്നുപേരും റഷ്യയിലെ മെഡിക്കല്‍ വിദ്യാര്‍ഥികളാണ്. കെഎസ്‌ആര്‍ടിസി സ്‌പെഷ്യല്‍ സര്‍വീസില്‍ കരുനാഗപ്പള്ളിയിലെത്തി സ്ഥാപന നിരീക്ഷണത്തിലായിരുന്നു. കോവിഡ് പോസിറ്റീവ് സ്ഥിരീകരിച്ചതിനെ തുടര്‍ന്ന് ഇന്നലെ പാരിപ്പള്ളി സര്‍ക്കാര്‍ മെഡിക്കല്‍ കോളജില്‍ പ്രവേശിപ്പിച്ചു.

പവിത്രേശ്വരം മാറനാട് സ്വദേശി(40), മൈനാഗപ്പള്ളി ഇടവനശ്ശേരി സ്വദേശി(32), കൊല്ലം മങ്ങാട് കിളികൊല്ലൂര്‍ സ്വദേശി(37) എന്നിവര്‍ നൈജീരിയയില്‍ നിന്നും എപികെ-7812 ഫ്‌ളൈറ്റില്‍ മെയ് 31ന് കൊച്ചിയിലെത്തി കെഎസ്‌ആര്‍ടിസി സ്‌പെഷ്യല്‍ സര്‍വീസില്‍ വള്ളിക്കാവില്‍ സ്ഥാപന നിരീക്ഷണത്തിലായിരുന്നു. ഇന്നലെ കോവിഡ് പോസിറ്റീവ് സ്ഥിരീകരിച്ചതിനെ തുടര്‍ന്ന് പാരിപ്പള്ളി സര്‍ക്കാര്‍ മെഡിക്കല്‍ കോളജില്‍ ചികിത്സയിലാണ്.

കരുനാഗപ്പള്ളി തൊടിയൂര്‍ സ്വദേശി(33) ബഹ്‌റിനില്‍ നിന്നും ജൂണ്‍ 6ന് ജിഎഫ്-7714 ഫ്‌ളൈറ്റില്‍ കൊച്ചിയില്‍ എത്തി കെഎസ്‌ആര്‍ടിസി സ്‌പെഷ്യല്‍ സര്‍വീസില്‍ കരുനാഗപ്പള്ളിയിലെത്തി ഗൃഹനീരീക്ഷണത്തിലായിരുന്നു. ഇന്നലെ രോഗം സ്ഥിരീകരിച്ചതിനാല്‍ പാരിപ്പള്ളി സര്‍ക്കാര്‍ മെഡിക്കല്‍ കോളജില്‍ പ്രവേശിപ്പിച്ചു.

മൈനാഗപ്പള്ളി സ്വദേശി(54) മുംബൈയില്‍ നിന്നും നേത്രാവതി ട്രെയിനില്‍ ജൂണ്‍ അഞ്ചിന് കൊല്ലത്തെത്തി ഗൃഹനിരീക്ഷണത്തില്‍ തുടരുകയായിരുന്നു. ഇന്നലെ കോവിഡ് സ്ഥിരീകരിച്ചതിനെ തുടര്‍ന്ന് പാരിപ്പള്ളി സര്‍ക്കാര്‍ മെഡിക്കല്‍ കോളജില്‍ പ്രവേശിപ്പിച്ചു.