സിന്ധുമോള് ആര്
ന്യൂഡല്ഹി: ഡിജിറ്റല്വത്കരണത്തിലൂടെ ഇന്ത്യയുടെ സാമ്പത്തിക മുന്നേറ്റത്തിന് കുതിപ്പേകാനായി ടെക്നോളജി ഭീമനായ ഗൂഗിള് അടുത്ത 5 മുതല് എഴുവര്ഷത്തിനകം ഇന്ത്യയില് 1,000 കോടി ഡോളര് (75,000 കോടി രൂപ) നിക്ഷേപിക്കും. “ഗൂഗിള് ഫോര് ഇന്ത്യ ഡിജിറ്റൈസേഷന്” എന്ന പേരില് ഗൂഗിളിന്റെയും മാതൃകമ്പനിയായ ആല്ഫബെറ്റിന്റെയും സി.ഇ.ഒയും ഇന്ത്യന് വംശജനുമായ സുന്ദര് പിച്ചൈയാണ് നിക്ഷേപം പ്രഖ്യാപിച്ചത്.
ഗൂഗിളിന് ഇന്ത്യയുടെ ഭാവിയിലും ഡിജിറ്റല് സമ്പദ് വ്യവസ്ഥയിലും മികച്ച പ്രതീക്ഷകള് ഉണ്ടെന്നതിന്റെ പ്രതിഫലനമാണ് ഈ നിക്ഷേപമെന്ന് സുന്ദര് പിച്ചൈ പറഞ്ഞു. ആറാമത് ഗൂഗിള് ഫോര് ഇന്ത്യ പരിപാടിയോട് അനുബന്ധിച്ച്, പ്രധാനമന്ത്രി നരേന്ദ്ര മോദിയുമായി ഇന്നലെ രാവിലെ നടത്തിയ വീഡിയോ കോണ്ഫറന്സിംഗിലാണ് പിച്ചൈ നിക്ഷേപം പ്രഖ്യാപിച്ചത്. പ്രധാനമന്ത്രിയുടെ ഡിജിറ്റല് ഇന്ത്യ കാമ്പയിന് പിന്തുണയേകുന്നത് അഭിമാനാര്ഹമായാണ് ഗൂഗിള് കാണുന്നതെന്ന് പറഞ്ഞ പിച്ചൈ, ആധുനികവത്കരണത്തിനും വികസനത്തിനുമാണ് ഫണ്ട് ഉപയോഗിക്കുകയെന്നും വ്യക്തമാക്കി. ആധുനിക – ഡിജിറ്റല്വത്കരണത്തിന്റെ പ്രയോജനം നേടുക മാത്രമല്ല, ഈ രംഗത്ത് ഇന്ത്യ നായകസ്ഥാനം നേടണമെന്നാണ് ആഗ്രഹമെന്നും അദ്ദേഹം പറഞ്ഞു.