മോര്ച്ചറിയുടെ താക്കോല് കാണാതായതിനെചൊല്ലി പാലാ ജനറല് ആശുപത്രിയില് ബഹളം
സിന്ധുമോള് ആര്
പാലാ: ജനറല് ആശുപത്രിയില് മോര്ച്ചറിയുടെ താക്കോല് കാണാതായതിനെച്ചൊല്ലി ബഹളം. പതിവായി സൂക്ഷിച്ചിരുന്നിടത്ത് താക്കോല് കാണാതായതാണ് ബഹളത്തിന് ഇടയാക്കിയത്. ചൊവ്വാഴ്ച രാവിലെയാണ് സംഭവം.
വിവിധ സ്റ്റേഷന് അതിര്ത്തികളില് കഴിഞ്ഞ ദിവസങ്ങളില് മൃതദേഹങ്ങള് കോവിഡ് പരിശോധനക്ക് മോര്ച്ചറിയില് സൂക്ഷിച്ചിരുന്നു. പരിശോധന പൂര്ത്തിയാക്കി ഇന്ക്വസ്റ്റ് നടത്താനെത്തിയപ്പോഴാണ് താക്കോല് കാണാനില്ലെന്ന് അറിഞ്ഞത്. പതിവായി താക്കോല് സൂക്ഷിക്കുന്നിടത്ത് തിരഞ്ഞെങ്കിലും കിട്ടിയില്ല. ഇതിനിടെ മരിച്ചവരുടെ ബന്ധുക്കളില് ചിലര് പ്രതിഷേധിച്ചു.
തുടര്ന്ന് കഴിഞ്ഞ ദിവസം ഡ്യൂട്ടിയിലുണ്ടായിരുന്ന ആളെ വിളിച്ചുവരുത്തി മോര്ച്ചറി തുറന്ന് നടപടി പൂര്ത്തീകരിക്കുകയായിരുന്നു. പതിവായി താക്കോല്വെക്കുന്ന സ്ഥലം മാറിപ്പോയതാണ് പ്രശ്നങ്ങള്ക്ക് ഇടയാക്കിയത്.