![“Manju”](https://santhigirinews.org/wp-content/uploads/2020/04/YOUTUBE.jpg")
സിന്ധുമോള്‍ ആര്‍
ലണ്ടന്‍ : കാമുകിയെ ഇംപ്രസ് ചെയ്യിക്കാന്‍ മെഴുകുതിരി അലങ്കാരം നടത്തി തിരിച്ചുവന്ന കാമുകന്‍ കണ്ടത് അപാര്‍ട്ട്മെന്‍റ് കത്തിയമരുന്നത്. ബ്രിട്ടനിലെ സൗത്ത് യോര്‍ക്ക്ഷെയറിലാണ് സംഭവം നടന്നത്. ഷെഫീല്‍ഡിലെ അബ്ബിഡെയ്ല്‍ റോഡിലുള്ള അപാര്ട്ട്മെന്റില് നൂറുകണക്കിന് ടീ ലൈറ്റ് മെഴുകുതിരികള്‍ കത്തിച്ച്‌ ‘മാരി മീ’ എന്നെഴുതിയാണ് ആല്‍ബര്‍ട്ട് എന്‍ഡ്രേ പ്രണയിനിയായ വലേറിയ മെഡ്‌വികിനെ വിളിച്ചുകൊണ്ടുവരാന്‍ പോയത്. 100ലധികം ടീ ലൈറ്റുകളും 60 ബലൂണുകളും ഉപയോഗിച്ചായിരുന്നു അലങ്കാരം. ഒരു ബോട്ടില്‍ വൈനും കരുതിവെച്ചിരുന്നു. കാമുകിയുമായി തിരികെ വരുമ്പോള്‍ കാണുന്നത് അപാര്ട്ട്മെന്റില് നിന്ന് തീയും പുകയും ഉരുന്നതും മൂന്ന് ഫയര്‍ഫോഴ്സ് യൂണിറ്റുകള്‍ നിന്ന് കഷ്ടപ്പെട്ട് തീയണക്കുന്നതുമാണ്.
ടീ ലൈറ്റുകള്‍ക്കരികില്‍ കത്തിക്കാതെ വെച്ചിരുന്ന മെഴുകുതിരികളിലേക്കും പിന്നീട് കര്‍ട്ടനിലേക്കും തീ പടര്‍ന്നാണ് വീട് മുഴുവന്‍ കത്തിയത്. എന്തായാലും തീപിടിത്തത്തില്‍ ആളപായമില്ല. കത്തിയമര്‍ന്ന അപാര്ട്ട്മെന്റില് വെച്ച്‌ തന്നെ ആല്‍ബര്‍ട്ട് വലേറിയയോട് വിവാഹാഭ്യര്‍ഥന നടത്തി. അവള്‍ സമ്മതം മൂളുകയും ചെയ്തു.
സൗത്ത് യോര്‍ക്ക്ഷെയര്‍ ഫയര്‍ ആന്‍ഡ് റസ്ക്യൂ വിഭാഗം ചിത്രങ്ങള്‍ ഫേസ്ബുക്കില്‍ പങ്കുവെച്ചതോടെയാണ് സംഭവം പുറംലോകമറിയുന്നത്. ‘കത്തിച്ച മെഴുകുതിരികള്‍ മനോഹരങ്ങളാണ്. പക്ഷേ, വളരെ അപകടകാരികളും’ എന്ന മുന്നറിയിപ്പും അവര്‍ നല്‍കി.
