ന്യൂഡല്ഹി: എന്സിപി ദേശീയ അധ്യക്ഷന് ശരദ് പവാര് കേരളത്തിലേക്ക്. നിയമസഭാ തെരഞ്ഞെടുപ്പ് അടുത്തിരിക്കെ എന്സിപി സംസ്ഥാന ഘടകത്തില് തര്ക്കം രൂക്ഷമായിരിക്കുന്ന സാഹചര്യത്തിലാണ് അദ്ദേഹത്തിന്റെ സന്ദര്ശനം. കൂടാതെ പ്രഫുല് പട്ടേലും അദ്ദേഹത്തിനൊപ്പം കേരളത്തിലെത്തും. രണ്ടാഴ്ചയ്ക്കുള്ളില് ഇരുവരും എത്തുമെന്നാണ് സൂചന. നിയമസഭാ സമ്മേളനത്തിന് ശേഷം ഇടതുമുന്നണി വിടാനാണ് എന്സിപി നീക്കം. എന്നാല് ഈ തീരുമാനത്തോട് ശശീന്ദ്രന് പക്ഷത്തിന് എതിര്പ്പാണ്. ഇതുമായി ബന്ധപ്പെട്ട് എ.കെ.ശശീന്ദ്രന് ശരദ് പവാറിനെ സന്ദര്ശിച്ചിരുന്നു. എന്നാല് ഇതിനു പിന്നാലെ ശരദ് പവാറിനെ കാണാന് മാണി സി. കാപ്പനും പീതാംബരന് മാസ്റ്ററും ബുധനാഴ്ച മുംബൈയില് എത്തിയിരുന്നു.