ക്യാമ്പസുകളിലെ ലഹരി ഉപയോഗം തടയാൻ പ്രത്യേക പദ്ധതി വേണം; ഹൈക്കോടതി

കൊച്ചി : സംസ്ഥാനത്തെ ക്യാമ്പസുകൾ ലഹരിമുക്തമാക്കാൻ കർശന നിർദ്ദേശങ്ങളുമായി ഹൈക്കോടതി. ലഹരി ഉപയോഗം തടയാൻ പ്രത്യേക പദ്ധതി ആവിഷ്‌കരിക്കണമെന്ന് കോടതി നിർദ്ദേശിച്ചു. മൂന്ന് മാസത്തിനുള്ളിൽ നിർദ്ദേശങ്ങൾ നടപ്പാക്കി റിപ്പോർട്ട് സമർപ്പിക്കാനാണ് കോടതി ഉത്തരവ്. ക്യാമ്പസുകളിലെ ലഹരിമരുന്ന് ഉപയോഗത്തിനെതിരെ കോട്ടയം മുൻ ജില്ലാ പോലീസ് മേധാവി എൻ. രാമചന്ദ്രൻ ഐപിഎസ് നൽകിയ പരാതിയിലാണ് കോടതി നടപടി.

ക്യാമ്പസിൽ ലഹരി ഉപയോഗം വർദ്ധിക്കുന്നുവെന്ന സ്‌പെഷ്യൽ ബ്രാഞ്ച് റിപ്പോർട്ടിൽ കോടതി ആശങ്ക പ്രകടിപ്പിച്ചു. 400 വിദ്യാഭ്യാസ സ്ഥാപനങ്ങളിൽ ലഹരി ഉപയോഗം സജീവമാണെന്നാണ് റിപ്പോർട്ടിലുള്ളത്. വിദ്യാർത്ഥികൾക്കിടയിൽ ലഹരിമരുന്ന ഉപയോഗം വർദ്ധിക്കുന്ന സാഹചര്യത്തിൽ ശക്തമായ നടപടിയെടുക്കാൻ കഴിയാത്തത് വെല്ലുവിളിയാണെന്നും കോടതി കുറ്റപ്പെടുത്തി.