കൊറോണ വ്യാപനം രൂക്ഷം: മഹാരാഷ്ട്രയിലെ നാഗ്പുരിൽ ലോക്ഡൗൺ ഏർപ്പെടുത്തി

മുബൈ: കൊറോണ രോഗ വ്യാപനം രൂക്ഷമായതിനെ തുടർന്ന് മഹാരാഷ്ട്രയിലെ നാഗ്പുരിൽ ലോക്ഡൗൺ പ്രഖ്യാപിച്ചു. മാർച്ച് 15 മുതൽ 21 വരെയാണ് ലോക്ഡൗൺ ഏർപ്പെടുത്തിയിരിക്കുന്നത്. നാഗ്പുർ പോലീസ് കമ്മീഷ്ണറേറ്റിന് കീഴിലുള്ള പ്രദേശങ്ങളിലാണ് ലോക്ഡൗൺ. പാൽ, പച്ചക്കറി, തുടങ്ങിയ അവശ്യ സർവ്വീസുകൾ പ്രവർത്തിക്കുമെന്ന് അധികൃതർ അറിയിച്ചു.

പത്ത് ദിവസത്തിനുള്ളിൽ കൊറോണ വ്യാപനം നിയന്ത്രിക്കാൻ സാധിച്ചില്ലെങ്കിൽ സംസ്ഥാനത്ത് ലോക്ഡൗൺ ഏർപ്പെടുത്തുമെന്ന് ആഭ്യന്തരമന്ത്രി അസ്ലം ഷെയ്ക്ക് നേരത്തെ മുന്നറിയിപ്പ് നൽകിയിരുന്നു. മഹാരാഷ്ട്രയിൽ കഴിഞ്ഞ 24 മണിക്കൂറിനിടെ 13,659 പേർക്കാണ് രോഗം സ്ഥിരീകരിച്ചത്. ഇതിൽ 1750 കേസുകളും നാഗ്പുരിലാണ്. രാജ്യത്തെ ആകെ രോഗികളിൽ 60 ശതമാനവും മഹാരാഷ്ട്രയിൽ നിന്നുള്ളതാണ്.