മുല്ലപ്പെരിയാർ സുരക്ഷ അതീവ പ്രധാനം: വിവരങ്ങൾ നൽകണമെന്ന് സുപ്രീം കോടതി

ന്യൂഡൽഹി: മുല്ലപ്പെരിയാർ അണക്കെട്ടിന്റെ സുരക്ഷ അതീവ പ്രധാന്യമേറിയതെന്ന് സുപ്രീം കോടതി. മുല്ലപ്പെരിയാർ അണക്കെട്ടിലെ ജലസംഭരണം സംബന്ധിച്ച വിവരങ്ങൾ മേൽന്നോട്ട സമിതിയ്ക്ക് നൽകാൻ തമിഴ്‌നാട് സർക്കാരിനോട് സുപ്രീം കോടതി നിർദ്ദേശിച്ചു. ഏപ്രിൽ 22ന് കേസ് വീണ്ടും പരിഗണിക്കും.

അണക്കെട്ടിന്റെ സുരക്ഷ കൃത്യമായി നിരീക്ഷിക്കുന്നതിന് വേണ്ടിയാണ് പ്രദേശികമായി പ്രവർത്തിക്കുന്ന എഞ്ചിനീയർമാർ ഉൾപ്പെടുന്ന ഉപസമിതിയ്ക്ക് രൂപം നൽകിയത്. ഉപസമിതി രൂപീകരണം ഭരണഘടന ബെഞ്ചിന്റെ വിധി അല്ലെന്ന് കേന്ദ്ര ജല കമ്മീഷൻ കോടതിയെ അറിയിച്ചിരുന്നു. പ്രളയവും ഭൂചലനവും അതിജീവിക്കാൻ അണക്കെട്ട് പ്രാപ്തമാണെന്നും കേന്ദ്രസർക്കാരിന് വേണ്ടി ഹാജരായ സോളിറ്റർ ജനറൽ തുഷാർ മേത്ത കോടതിയിൽ വ്യക്തമാക്കി.