![“Manju”](https://santhigirinews.org/wp-content/uploads/2020/04/YOUTUBE.jpg")
കോട്ടയം: മെഡിക്കല്‍ കോളജ് കുട്ടികളുടെ ആശുപത്രി സര്‍ജറി തീവ്രപരിചരണ വിഭാഗത്തില്‍ ചികിത്സയില്‍ കഴിയുന്ന അസം സ്വദേശികളുടെ മകളായ അഞ്ചുവയസ്സുകാരിയുടെ ആരോഗ്യനില ഗുരുതരം. വിദഗ്ധ പരിശോധനയില്‍ മലദ്വാരത്തിലും കുടലിലും മുറിവുകള്‍ കണ്ടെത്തി. അടിയന്തര ശസ്ത്രക്രിയക്ക് വിധേയമാക്കി. കുട്ടിയുടെ ആരോഗ്യനിലയില്‍ വലിയ മാറ്റമില്ലെന്ന് ആര്‍.എം.ഒ ഡോ. ജയപ്രകാശ് അറിയിച്ചു.
അസം സ്വദേശികളും മൂവാറ്റുപുഴ പെരുമുറ്റത്ത് വാടകക്ക് താമസിക്കുന്നവരുമായ ദമ്ബതികളുടെ കുഞ്ഞിനെ 27 നാണ് ആശുപത്രിയില്‍ പ്രവേശിപ്പിച്ചത്. വയറുവേദനയും വയര്‍ വീര്‍ത്തുവരുകയും മലദ്വാരത്തിലൂടെ രക്തം പോകുന്നതും ശ്രദ്ധയില്‍പെട്ട മാതാപിതാക്കള്‍ മൂവാറ്റുപുഴയിലെ സ്വകാര്യ ആശുപത്രിയില്‍ പ്രവേശിപ്പിച്ചു. അവിടെനിന്നാണ് കോട്ടയം മെഡിക്കല്‍ കോളജിലെ കുട്ടികളുടെ ആശുപത്രിയില്‍ എത്തിച്ചത്. വിശദ പരിശോധനയില്‍ കുട്ടി ലൈംഗിക അതിക്രമത്തിന് ഇരയായതായി ഡോക്ടര്‍മാര്‍ക്ക് സംശയമുയര്‍ന്നു. ഇതോടെ പൊലീസില്‍ അറിയിച്ചു.
കുട്ടിയുടെ പിതാവും രണ്ടാനമ്മയുമാണ് ആശുപത്രിയിലുള്ളത്. പിതാവിനെ ചോദ്യം ചെയ്യാന്‍ പൊലീസ് വിളിപ്പിച്ചിരുന്നു. കുട്ടിക്ക് എന്താണ് സംഭവിച്ചതെന്ന് അറിയില്ലെന്നാണ് രണ്ടാനമ്മയുടെ പ്രതികരണം. ചികിത്സയില്‍ കഴിയുന്ന കുട്ടിയുടെ മാതാവിനെ സന്ദര്‍ശിച്ച നവജീവന്‍ തോമസ്, ചികിത്സക്ക് ആവശ്യമായ മുഴുവന്‍ സഹായവും വാഗ്ദാനം ചെയ്തു. കുട്ടിയെ പരിചരിക്കാന്‍ നവജീവന്‍ വളന്‍റിയര്‍മാരെ വിട്ടുനല്‍കുമെന്നും മാതാവിനൊപ്പമുള്ള കുട്ടികള്‍ക്ക് ഭക്ഷണം നല്‍കുമെന്നും അദ്ദേഹം പറഞ്ഞു.
