എച്ച്-1ബി വിസക്കുള്ള നിയന്ത്രണങ്ങള് നീക്കി
വാഷിങ്ടണ്: അമേരിക്കന് കമ്പനികള്ക്ക് മറ്റു രാജ്യങ്ങളിലെ സാങ്കേതിക വിദഗ്ധരെ ജോലിക്കായി നിയോഗിക്കാന് സഹായിക്കുന്ന എച്ച് 1 ബി ഉള്പ്പെടെ വിദേശ തൊഴിലാളികള്ക്ക് ഏര്പ്പെടുത്തിയിരുന്ന വിസക്കുള്ള നിയന്ത്രണങ്ങള് നീക്കി പ്രസിഡന്റ് ജോ ബൈഡന്. ഡോണള്ഡ് ട്രംപ് പ്രസിഡന്റായിരിക്കെ 2020ല് ഏര്പ്പെടുത്തിയിരുന്ന വിലക്കാണ് പൂര്ണമായും ബൈഡന് റദ്ദാക്കിയത് .
ഐ.ടി, ശാസ്ത്ര, എന്ജിനീയറിങ് അടക്കമുള്ള മേഖലകളിലെ പ്രഫഷണലുകളായ ഇന്ത്യന് പൗരന്മാര്ക്ക് ഏറെ ഗുണം ചെയ്യുന്നതാണ് ബൈഡന് ഭരണകൂടത്തിന്റെ പുതിയ തീരുമാനം.എച്ച് 1 ബി കൂടാതെ ഹോട്ടല്, നിര്മാണ മേഖലകളിലെ എച്ച് 2 ബി, വലിയ കോര്പറേറ്റ് സ്ഥാപനങ്ങളില് ജോലിക്കുള്ള എല് 1, പ്രഫസര്മാര് , ഗവേഷകര്,എന്നിവര്ക്കുള്ള ജെ 1 വിസകള്ക്കുണ്ടായിരുന്ന വിലക്കുകളും നീക്കിയിട്ടുണ്ട് . ട്രംപ് ഭരണകൂടത്തിന്റെ വിലക്ക് മാര്ച്ച് 31ന് അവസാനിരിക്കെ പ്രസിഡന്റ് ബൈഡന് പുതിയ ഉത്തരവ് ഇറക്കാതെയിരുന്ന സാഹചര്യത്തിലാണ് നിയന്ത്രണങ്ങള് ഇല്ലാതായത്.
വിദേശികളുടെ സാന്നിധ്യം വലിയ ഭീഷണി ഉയര്ത്തുന്നുവെന്ന് ചൂണ്ടിക്കാട്ടി 2020 ജൂണിലാണ് അമേരിക്കയിലേക്കുള്ള തൊഴിലാളി വിസകള്ക്ക് താല്കാലിക നിയന്ത്രണം ഏര്പ്പെടുത്താന് ട്രംപ് ഭരണകൂടം തീരുമാനിച്ചത്. യു.എസിലേക്ക് കുടിയേറാന് ശ്രമിച്ച പതിനായിരങ്ങള്ക്ക് അവസരങ്ങള് നിഷേച്ചതിന് പുറമെ മുന്നിര ഇന്ത്യന് കമ്പനികള്ക്ക് വരുമാന നഷ്ടത്തിനും വിസാ വിലക്ക് ഇടയാക്കിയിരുന്നു. എച്ച്-1ബി വിസ ഏറ്റവും കൂടുതല് നല്കുന്നത് ആമസോണാണ്. രണ്ടാമത് ഗൂഗിളും മൂന്നാം സ്ഥാനത്ത് ഇന്ത്യന് കമ്ബനി ടാറ്റ കണ്സള്ട്ടന്സിയുമാണ്.