ബ്രിട്ടാനിയയുടെ ചീഫ് കൊമേഴ്സ്യല് ഓഫീസര് ഇനി ബാറ്റയുടെ സി.ഇ.ഒ
മുംബൈ: രാജ്യത്തെ ഏറ്റവും വലിയ ഫുട്വെയര് റീട്ടെയ്ലേഴ്സായ ബാറ്റയുടെ ഇന്ത്യന് സി.ഇ.ഒയായി ഗുന്ജന് ഷായെത്തുന്നു. നിലവിലെ സി.ഇ.ഒ ആയിരുന്നു സന്ദീപ് കതാരിയയെ ഗ്ലോബല് സി.ഇ.ഒ ആയി നിയമിച്ചിരുന്നു. ഇതിന് പിന്നാലെയാണ് ഇന്ത്യന് സി.ഇ.ഒ ആയി ഷായെത്തുന്നത്.
ബ്രിട്ടാനിയ ഇന്ഡസ്ട്രീസില് ചീഫ് കൊമേഴ്സ്യല് ഓഫീസര് ആയിരുന്ന ഗുന്ജന് ഷാ ജൂണ് 21 നാണ് ബാറ്റയില് ചുമതലയേല്ക്കുക. അഞ്ച് വര്ഷത്തേക്ക് കമ്പനിയുടെ മുഴുവന് സമയ ഡയറക്ടറായി ഗുന്ജന് ഷായെ നിയമിച്ചതായി ബാറ്റ വെള്ളിയാഴ്ച സ്റ്റോക് എക്സ്ചേഞ്ച് ഫയലിങ്ങില് അറിയിച്ചിരുന്നു.
ഏഷ്യന് പെയ്ന്റ്സ്, മോട്ടറോള എന്നിവിടങ്ങളില് പ്രവര്ത്തിച്ച ഷാ 2007 മുതലാണ് ബ്രിട്ടാനിയയുടെ ഭാഗമാകുന്നത്.
ബാറ്റയുടെ ആസ്ഥാനം സ്വിറ്റ്സര്ലന്റ് ആണെങ്കിലും അവരുടെ 70 ശതമാനവും വിപണിയും ഇന്ത്യ കേന്ദ്രീകരിച്ചാണ്. ബാറ്റയുടെ ഉടമസ്ഥതയിലും ഫ്രാഞ്ചൈസികളും വഴി രാജ്യത്ത് 1600 ലേറെ സ്റ്റോറുകള് ഉണ്ട്. ബാറ്റക്ക് പുറമെ ഹഷ് പപ്പീസ്, നാച്ചുറലൈസര്, പവര്, മാരി ഗ്ലയര്, വെയ്ന് ബ്രെന്നര്, നോര്ത് സ്റ്റാര്, ഷോള് തുടങ്ങിയ ബ്രാന്ഡുകളും ബാറ്റയുടെതാണ്