ന്യൂഡല്ഹി: എല് പി ജി സിലിണ്ടറുകള് ഉപയോക്താക്കള്ക്ക് ഇഷ്ടമുള്ള വിതരണക്കാരില് നിന്ന് റീഫില് ചെയ്യാനുള്ള സൗകര്യവുമായി കേന്ദ്ര പെട്രോളിയം-പ്രകൃതി വാതക മന്ത്രാലയം. ഉപയോക്താക്കള്ക്ക് ഏറ്റവും അടുത്തുള്ള വിതരണക്കാരില് നിന്നും സിലിണ്ടറുകള് റീഫില് ചെയ്യാന് അവസരമൊരുക്കുന്നതാണ് ഈ പുതിയ തീരുമാനം. നിലവില് തെരഞ്ഞെടുത്ത ഡീലര്മാരില് നിന്നു മാത്രമാണ് എല് പി ജി സിലിണ്ടര് ബുക്ക് ചെയ്യാന് സാധിക്കുക.
എല് പി ജി കണക്ഷന് എടുത്ത ഓയില് മാര്ക്കറ്റിങ് കമ്പനിയുടെ (ഒഎംസി) പട്ടികയില് നിന്ന് വിതരണക്കാരുടെ വിവരങ്ങള് ലഭിക്കും. ഗ്യാസ് ബുക്ക് ചെയ്യുന്ന സമയത്തുതന്നെ മൊബൈല് ആപ്പില് നിന്ന് വിതരണക്കാരെ തെരഞ്ഞെടുക്കാന് കഴിയും. ഇതുവഴി സിലിണ്ടറുകളുടെ ലഭ്യത കുറവുള്ള പ്രദേശങ്ങളില് താമസിക്കുന്നവരുടെ ബുദ്ധിമുട്ടുകള്ക്ക് പരിഹാരം കാണാം എന്നാണ് പെട്രോളിയം-പ്രകൃതി വാതക മന്ത്രാലയം കരുതുന്നത്. ആദ്യ ഘട്ടത്തില് ചണ്ഡിഗഡ്, കോയമ്പത്തൂര്, ഗുരുഗ്രാം, പൂനെ, റാഞ്ചി എന്നീ അഞ്ച് നഗരങ്ങളിലാണ് പദ്ധതി നടപ്പാക്കുക.