പട്ന: കോവിഡ് വാക്സിന് കുത്തിവെപ്പ് എടുക്കാത്തവരെ ബീഹാറിലെ പഞ്ചായത്ത് തെരഞ്ഞെടുപ്പില് മത്സരിക്കാന് അനുവദിക്കരുതെന്ന് മന്ത്രി. വാക്സിന് എടുക്കാത്തവരെ മത്സരിപ്പിക്കരുതെന്ന് പഞ്ചായത്ത് മന്ത്രി രാജ് സമരത് ചൗധരിയാണ് സംസ്ഥാന തെരഞ്ഞെടുപ്പ് കമ്മീഷനോട് ആവശ്യപ്പെട്ടിരിക്കുന്നത്.
പഞ്ചായത്ത് തെരഞ്ഞെടുപ്പിന് മുമ്പ് സംസ്ഥാന ഇലക്ഷന് കമീഷന് ഇത് സംബന്ധിച്ച് ഒരു മാര്ഗനിര്ദ്ദേശം പുറപ്പെടുവിക്കണമെന്നും മന്ത്രി കമീഷനോട് ആവശ്യപ്പെട്ടു. 38 ജില്ലകളിലായി 534 ബ്ലോക്കുകളിലായി 8,406 പഞ്ചായത്തുകളാണ് ബീഹാറിലുള്ളത്.സംസ്ഥാനത്ത് കോവിഡ് രോഗ വ്യാപനം രൂക്ഷമായിരുന്നു. ലോക്ഡൗണും കര്ശന നിയന്ത്രണങ്ങളും ഏര്പ്പെടുത്തിയാണ് സംസ്ഥാനം ഒരു പരിധിവരെ വൈറസിനെതിരെ പോരാടിയത്. ഇതിനിടെ കോവിഡ് രോഗ ബാധിതരുടെയും മരിച്ചവരുടെയും എണ്ണം സംസ്ഥാനം കുറച്ച് കാണിച്ചതായി ആരോപണം ഉയര്ന്നിരുന്നു.
ബീഹാറിലെ ഔദ്യോഗിക കോവിഡ് മരണസംഖ്യ 7,717 ആണെന്നാണ് സംസ്ഥാനം അവകാശപ്പെടുന്നത്. അതെ സമയം 75,000 ത്തോളം പേര് സംസ്ഥാനത്ത് കോവിഡ് ബാധിച്ച് മരിച്ചെന്നാണ് അനൗദ്യോഗിക കണക്കുകള് ചൂണ്ടിക്കാട്ടുന്നത് .