![“Manju”](https://santhigirinews.org/wp-content/uploads/2020/04/YOUTUBE.jpg")
ന്യൂഡല്‍ഹി: കോവിഡ് ബാധിച്ച്‌ രോഗമുക്തി നേടിയവര്‍ വാക്സിന് സ്വീകരിച്ചാല്‍, കോവിഡ് വരാതെ വാക്സിന് സ്വീകരിച്ചവരേക്കാള്‍ പ്രതിരോധ ശേഷി കൈവരുമെന്ന് പഠനം. കോവിഡ് ഭേദമായി ഒന്നോ രണ്ടോ ഡോസ് വാക്സിന് സ്വീകരിച്ച ആളുകള്‍ക്ക് ഒന്നോ രണ്ടോ ഡോസ് കോവിഷീല്‍ഡ് വാക്സിന് സ്വീകരിച്ചവരേക്കാള്‍ ഡെല്‍റ്റ വകഭേദത്തിനെതിരെ ഉയര്‍ന്ന പ്രതിരോധം കൈവരിക്കാന്‍ സാധിക്കുന്നതായി പഠനം കണ്ടെത്തി.
കോവിഷീല്‍ഡ് വാക്സിനും വാക്സിന് എടുത്ത രോഗമുക്തരും എങ്ങനെ കോവിഡ് ഡെല്‍റ്റ പ്ലസ് വകഭേദത്തിനെ നിര്‍വീര്യമാക്കുന്നു എന്നതിനെ കുറിച്ച്‌ ഐ.സി.എം.ആര്‍ ആണ് പഠനം നടത്തിയത്. കോവിഡിനെതിരായ പ്രതിരോധത്തിന് ആന്‍റിബോഡി പ്രതിരോധ പ്രതികരണവും സെല്ലുലാര്‍ പ്രതിരോധ പ്രതികരണവും മികച്ച ഫലം നല്‍കുന്നുണ്ട്.
‘രോഗമുക്തിക്ക് ശേഷമുള്ള പ്രതിരോധ പ്രതികരണശേഷി, വാക്സിനേഷന്‍ അല്ലെങ്കില്‍ ബ്രേക്ക്ത്രൂ അണുബാധ എന്നിവയെ കുറിച്ച്‌ പരിമിതമായ വിവരങ്ങള്‍ മാത്രമാണ് ലഭ്യമായത്. ഈ പഠനത്തില്‍, കോവിഷീല്‍ഡ് വാക്സിനേഷന്‍ ലഭിച്ച വ്യക്തികളെ അഞ്ചാക്കി തരംതിരിച്ചാണ് രോഗപ്രതിരോധ പ്രതികരണം വിലയിരുത്തിയത്. I. ഒരു ഡോസ് വാക്സിന് എടുത്തവര്‍ II.രണ്ട് ഡോസുകള്‍ വാക്സിന് എടുത്തവര്‍, III. കോവിഡ് മുക്തി നേടിയ ശേഷം ഒരു ഡോസ് വാക്സിന് എടുത്തവര്‍, IV.കോവിഡ് മുക്തി നേടിയ ശേഷം രണ്ട് ഡോസ് വാക്സിന് എടുത്തവര്‍ V.ബ്രേക്ക്ത്രൂ കോവിഡ് കേസുകള്‍’ -പഠനത്തില്‍ പറയുന്നു.
ബ്രേക്ക്ത്രൂ കേസുകള്‍ക്കും കോവിഡ് മുക്തി നേടിയ ശേഷം ഒന്നോ രണ്ടോ ഡോസ് വാക്സിന് എടുത്തവര്‍ക്കും ഒന്നോ രണ്ടോ ഡോസ് കോവിഷീല്‍ഡ് വാക്സിന് എടുത്തവരേക്കാള്‍ ഡെല്‍റ്റ വകഭേദത്തിനെതിരെ പ്രതിരോധശേഷി കൈവന്നതായാണ് പഠനത്തില്‍ കണ്ടെത്തിയത്. ഡെല്‍റ്റ വകഭേദത്തിെന്‍റ അതിവ്യാപന ശേഷിയാണ് ഇന്ത്യയില്‍ കോവിഡ് രണ്ടാം തരംഗം രൂക്ഷമായി ബാധിക്കാന്‍ ഇടയാക്കിയതെന്നും പഠനം ചൂണ്ടിക്കാട്ടി.
