ഡല്ഹി: സൈഡസ് കാഡിലയുടെ കുട്ടികള്ക്കായുള്ള കോവിഡ് വാക്സിന് സെപ്റ്റംബര് അവസാനത്തോടെ വിതരണത്തിന് എത്തിയേക്കുമെന്ന് കേന്ദ്രസര്ക്കാരിന് കീഴിലുള്ള വിദഗ്ധ സമിതി ചെയര്മാന് ഡോ. എന് കെ അറോറ. 12 മുതല് 18 വയസ് വരെയുള്ള കുട്ടികള്ക്ക് ഇടയില് നടത്തിയ ക്ലിനിക്കല് പരീക്ഷണത്തിന്റെ റിപ്പോര്ട്ട് അടുത്ത മാസമോ സെപ്റ്റംബര് ആദ്യമോ സര്ക്കാരിന് ലഭിക്കുമെന്നും അദ്ദേഹം അറിയിച്ചു.
ഈ റിപ്പോര്ട്ടിന്റെ അടിസ്ഥാനത്തില് സെപ്റ്റംബര് അവസാനത്തോടെ കുട്ടികളുടെ വാക്സിന് വിതരണത്തിന് എത്തിക്കാന് കഴിയുമെന്നാണ് പ്രതീക്ഷയെന്നും എന്. കെ അറോറ അറിയിച്ചു. ഭാരത് ബയോടെക്ക് വികസിപ്പിച്ച കുട്ടികള്ക്കുള്ള കോവാക്സിന് വാക്സിന്റെ ക്ലിനിക്കല് പരീക്ഷണം ആരംഭിച്ചിട്ടുണ്ട്. സെപ്റ്റംബര് അവസാനത്തോടെ ഇതിന്റെ വിവരങ്ങള് ലഭ്യമാകും.