തിരുവനന്തപുരം: ഡിജിറ്റല് പഠനോപകരണങ്ങള് ഇല്ലാത്ത കുട്ടികളുടെ കണക്കെടുക്കുമെന്ന് മുഖ്യമന്ത്രി പിണറായി വിജയന്. ആദിവാസി മേഖലകളില് എല്ലാ വിദ്യാര്ഥികള്ക്കും ഡിജിറ്റല് വിദ്യാഭ്യാസം ഉറപ്പാക്കുമെന്നും അദ്ദേഹം പറഞ്ഞു.
പാഠപുസ്തകം പോലെ എല്ലാ കുട്ടികള്ക്കും ഡിജിറ്റല് ഉപകരണങ്ങള് ലഭ്യമാക്കാനാണ് സര്ക്കാര് ഉദ്ദേശിക്കുന്നത്. അതിനായി ജനകീയ കാമ്പയിന് സര്ക്കാര് ആരംഭിക്കുകയയാണെന്നും മുഖ്യമന്ത്രി പറഞ്ഞു.
ഓരോ വിദ്യാലയത്തിലും എത്ര കുട്ടികള്ക്ക് ഡിജിറ്റല് പഠനസൗകര്യം ലഭ്യമാണെന്നും എത്ര കുട്ടികള്ക്ക് ഉപകരണങ്ങള് ഇനിയും ലഭ്യമാക്കണമെന്നും കൃത്യമായി തിട്ടപ്പെടുത്തും. പിടിഎകളുടെ നേതൃത്വത്തിലുള്ള സ്കൂള്തല സമിതിക്കാണ് ഇതിന്റെ ചുമതല. ആദിവാസി വിഭാഗത്തിന് പ്രഥമ പരിഗണന നല്കി എല്ലാ കുട്ടികള്ക്കും ഡിജിറ്റല് വിദ്യാഭ്യാസം ഉറപ്പാക്കും.
ആദിവാസി വിഭാത്തില് ഡിജിറ്റല് പഠനോപകരണങ്ങള് കൈകാര്യം ചെയ്യാനുള്ള പരിശീലനം കുട്ടികള്ക്കും ആവശ്യമെങ്കില് രക്ഷിതാക്കള്ക്കും നല്കും. ആവശ്യമുള്ള ഊരുകളില് പഠന മുറികള് ഒരുക്കും. കണക്ടിവിറ്റി പ്രശ്നവും പരിഹരിക്കാന് നടപടിയെടുക്കുന്നുണ്ട്. ഡിജിറ്റല് ഉപകരണങ്ങളില്ലാത്ത ആദിവാസി-പട്ടികവര്ഗ വിഭാഗത്തിലെ കുട്ടികള്ക്കെല്ലാം ഉപകരണങ്ങള് ലഭ്യമാക്കും.
കോവിഡ് വ്യാപന പശ്ചാത്തലത്തില് കഴിഞ്ഞ വര്ഷം ഡിജിറ്റല് വിദ്യാഭ്യാസം ഫലപ്രദമായി നടത്താന് കഴിഞ്ഞു. വിക്ടേഴ്സ് ചാനല് വഴിയുള്ള ക്ലാസുകള് എല്ലാ കുട്ടികള്ക്കും ലഭ്യമായി. ഒരു ഭാഗത്തേക്ക് മാത്രമുള്ള ആശയവിനിമയം എന്നത് ടെലിവിഷന് ക്ലാസുകളുടെ പരിമിതിയാണ്. അത് മറികടന്ന് ഓരോ വിദ്യാലയത്തിലെയും അധ്യാപകര് തയാറാക്കുന്ന സംവാദാത്മക ക്ലാസുകള് ലഭ്യമാക്കാനാണ് ഇപ്പോള് ശ്രമിക്കുന്നത്. ആദ്യ ഘട്ടത്തില് ജി-സ്യൂട്ട് ഉപയോഗിച്ച് ഈ പ്രവര്ത്തനം തുടങ്ങും.
ധനകാര്യ സ്ഥാപനങ്ങളുടെ സാമ്ബത്തിക പിന്തുണയോടെ ഉപകരണങ്ങള് വാങ്ങാന് ശേഷിയുള്ളവര്ക്ക് വായ്പ-ചിട്ടി ലഭ്യമാക്കും. സ്വന്തം കുട്ടിക്ക് ഉപകരണങ്ങള് വാങ്ങിച്ച് നല്കുമ്ബോള് മറ്റൊരു കുട്ടിക്ക് കൂടി വാങ്ങി കൊടുക്കാന് പറ്റുന്നവരെ അതിനു പ്രേരിപ്പിക്കണം.
സ്കൂള്തലത്തില് സമാഹരിച്ച വിവരങ്ങള് തദ്ദേശസ്വയംഭരണ സ്ഥാപനതലത്തിലും ജില്ലാതലത്തിലും ക്രോഡീകരിക്കും. വിവരശേഖരണത്തിനും പ്രവര്ത്തനങ്ങള്ക്കും മേല്നോട്ടം വഹിക്കുന്നതിന് സ്കൂള്, വാര്ഡ്, തദ്ദേശസ്വയംഭരണ സ്ഥാപന, ജില്ലാ, സംസ്ഥാനതല സമിതികള് രൂപീകരിക്കും. സമിതികളില് ചിലത് ഇതിനകം പ്രവര്ത്തനമാരംഭിച്ചിട്ടുണ്ട്.
ഉപകരണങ്ങള് ആവശ്യമായ കുട്ടികളുടെ എണ്ണം ഡിജിറ്റല് വിദ്യഭ്യാസം ഉപ്പാക്കാനുള്ള കാമ്പയിന് പ്രവര്ത്തനത്തിനായി വികസിപ്പിച്ച പോര്ട്ടലില് ലഭ്യമാക്കും. ഈ പോര്ട്ടലില് ലഭ്യമാകുന്ന വിവരങ്ങളുടെ അടിസ്ഥാനത്തില് ഉപകരണങ്ങളോ പണമോ സംഭാവനയായി നല്കാം. കോര്പ്പറേറ്റ് സ്ഥാപനങ്ങളുടെ പൊതുനന്മാ ഫണ്ടും ഇതിനായി വിനിയോഗിക്കാം.
പൊതുനന്മാഫണ്ട് പ്രയോജനപ്പെടുത്താന് പ്രത്യേക പ്രോജക്ട് തയാറാക്കി നല്കാനുള്ള സംവിധാനവും പോര്ട്ടലിന്റെ ഭാഗമായി ഒരുക്കും. സംഭാവന സ്വീകരിക്കാന് സിഎംഡിആര്എഫിന്റെ ഉപഘടകമായി ചീഫ് മിനിസ്റ്റേഴ്സ് എഡ്യൂക്കേഷണല് എംപവര്മെന്റ് ഫണ്ട് രൂപീകരിക്കാന് തീരുമാനിച്ചിട്ടുണ്ടെന്നും മുഖ്യമന്ത്രി കൂട്ടിച്ചേര്ത്തു.