കൊല്ലം: ജില്ലയില് വാക്സിനേഷന് 20 ലക്ഷം ഡോസ് പിന്നിട്ടു. ചതയം ദിനത്തിലും ജില്ലയില് ഇന്നലെ 35,807 പേര്ക്ക് വാക്സീനെടുത്തു. ഇതോടെ വാക്സീന് എടുത്തവരുടെ ആകെ എണ്ണം 20,18,532 ആയി. ഓണാഘോഷം അവസാനിക്കുന്ന സാഹചര്യത്തില് വാക്സിനേഷന് ഡ്രൈവുകള് നടത്താനും ടെസ്റ്റുകളുടെ എണ്ണം വര്ധിപ്പിക്കാനും കോവിഡ് പ്രതിരോധം വിലയിരുത്താന് ചേര്ന്ന ഗൂഗിള് യോഗത്തില് ജില്ലാ കളക്ടര് ബി. അബ്ദുല് നാസര് നിര്ദേശം നല്കി.
സ്ക്വാഡ് പരിശോധനകളും മാനദണ്ഡ പാലനവും കര്ശനമായി തുടരണം. കോവിഡ് പോസിറ്റീവായി വീടുകളില് സൗകര്യമില്ലാത്തവരെ ഗൃഹവാസ പരിചരണ കേന്ദ്രങ്ങളിലേക്ക് മാറ്റുന്ന പ്രവര്ത്തനങ്ങളും അടിയന്തര പ്രധാന്യത്തോടെ ഏകോപിപ്പിക്കണമെന്ന് കളക്ടര് വ്യക്തമാക്കി. ജില്ലാ ഭരണകൂടം സംഘടിപ്പിക്കുന്ന ഓണത്തുടി 2021 ന്റെ ഭാഗമായ കലാവിരുന്ന് ഇന്ന് ഇഞ്ചവിളയിലെ വൃദ്ധപരിപാലന കേന്ദ്രത്തില് കോവിഡ് മാനദണ്ഡം പാലിച്ച് ഓണ്ലൈന് വഴി നടത്തുമെന്നും കളക്ടര് അറിയിച്ചു. മന്ത്രിമാര്, സാംസ്കാരിക നായകര്, പൗരപ്രമുഖര് തുടങ്ങിയവര് പങ്കെടുക്കും.
കൊല്ലത്തെ കൂടാതെ കോഴിക്കോട്, മലപ്പുറം, തിരുവനന്തപുരം, തൃശൂര് ജില്ലകള് മാത്രമാണ് 20 ലക്ഷത്തിലധികം ഡോസ് വാക്സീന് നല്കിയിട്ടുള്ളത്. നിലവില് 20 ലക്ഷം ഡോസ് വിതരണം ചെയ്തതില് രണ്ടു ഡോസ് സ്വീകരിച്ചവരും ഉള്പ്പെടുന്നു. അതിനാല് പ്രായപൂര്ത്തിയായ എല്ലാവര്ക്കും വാക്സീന് എന്ന ലക്ഷ്യത്തിലേക്ക് എത്താന് ആറു ലക്ഷം പേര്ക്കു കൂടി വാക്സീന് നല്കേണ്ടി വരും. കുറവില്ലാതെ വാക്സീന് ലഭിച്ചാല് ഒരു മാസത്തിനുള്ളില് ഈ നേട്ടത്തിലേക്ക് എത്താന് കഴിയുമെന്നാണ് ആരോഗ്യവകുപ്പ് അധികൃതരുടെ പ്രതീക്ഷ.