കരാട്ടെ ചാമ്പ്യന്ഷിപ്പ് അടുത്തമാസം
ദുബൈ: ലോക കരാട്ടെ സീനിയര് ചാമ്പ്യന്ഷിപ്പിന് ദുബൈ വേദിയാകും. ലോകത്തിന്റെ വിവിധ ഭാഗങ്ങളില് നിന്നായി 1800ലേറെ അത്ലറ്റുകള് പങ്കെടുക്കുന്ന ചാമ്ബ്യന്ഷിപ്പ് നവംബര് 16മുതല് 21വരെ ഹംദാന് സ്പോര്ട്സ് കോപ്ലക്സിലാണ് അരങ്ങേറുകയെന്ന് അധികൃതര് പത്രസമ്മേളനത്തില് അറിയിച്ചു. പങ്കാളിത്തത്തില് ചരിത്രത്തിലെ ഏറ്റവും വലിയ മല്സരത്തിനായിരിക്കും ദുബൈ ആതിഥേയത്വം വഹിക്കുകയെന്നും എക്സ്പോ നടക്കുന്ന ഘട്ടത്തില് ചാമ്പ്യന്ഷിപ്പ് നടത്താന് സാധിക്കുന്നതില് ഏറെ സന്തോഷമുണ്ടെന്നും ദുബൈ സ്പോര്ട്സ് കൗണ്സില് സെക്രട്ടറി ജനറല് സഈദ് ഹെറബ് പറഞ്ഞു. ഹംദാന് സ്പോര്ട്സ് കോംപ്ലക്സില് 2013ല് ഏഷ്യന് കരാട്ടെ ചാമ്പ്യന്ഷിപ്പിന് ആതിഥേയത്വം വഹിച്ചിട്ടുണ്ട്. 95അന്താരാഷ്ട്ര ചാമ്ബ്യന്ഷിപ്പുകളടക്കം 350 കായിക പരിപാടികള് കോപ്ലക്സില് ഇതിനകം നടന്നിട്ടുണ്ട്.
15,000പേര്ക്കിരിക്കാവുന്ന മള്ടി സ്പോര്ട്സ് ഇന്ഡോര് കോപ്ലക്സ് പൂര്ണമായും പരിസ്ഥിതി സൗഹൃദമായി നിര്മിച്ചതാണെന്നും അദ്ദേഹം കൂട്ടിച്ചേര്ത്തു. ചാമ്പ്യന്ഷിപ്പ് അതുല്യവും അവിസ്മരണീയവുമാക്കി മാറ്റാനുള്ള ശ്രമത്തിലാണ് യു.എ.ഇയെന്ന് പത്രസമ്മേളനത്തില് അധ്യക്ഷത വഹിച്ച ഏഷ്യന്-യു.എ.ഇ കരാട്ടെ ഫെഡറേഷന് പ്രസിഡന്റും ലോക കരാട്ടെ ഫെഡറേഷന് വൈസ് പ്രസിഡന്റുമായ മേജര് ജനറല് നാസര് അല് റസൂഖി പറഞ്ഞു. ഇന്ത്യ, ചൈന, ഇന്ത്യ, ജപ്പാന് തുടങ്ങിയ സ്ഥലങ്ങളില് നിന്നുള്ള താരങ്ങള് മല്സരത്തില് പങ്കെടുക്കും.ജനറല് അതോറിറ്റി ഓഫ് സ്പോര്ട്സ് അസി. സെക്രട്ടറി ജനറല് ഖാലിദ് ഈസ അല് മിദ്ഫ, ദുബൈ സ്പോര്ട്സ് കൗണ്സില് അസി. സെക്രട്ടറി ജനറല് നാസര് അമന് അല് റഹ്മ എന്നിവരും മറ്റു ഉന്നത ഉദ്യോഗസ്ഥരും പത്രസമ്മേളനത്തില് പങ്കെടുത്തു.