ദീപാവലി ആഘോഷിക്കാന്‍ 12 ലക്ഷം മൺവിളക്കുകൾ

ന്യൂഡൽഹി: കഴിഞ്ഞ വർഷത്തെ റെക്കോർഡ് മറികടന്ന്  “ദീപോത്സവം” ആഘോഷിക്കുന്നതിനായി ഉത്തർപ്രദേശ് സർക്കാർ നവംബർ 3 ന് അയോധ്യയിൽ 12 ലക്ഷം മൺവിളക്കുകൾ തെളിയിക്കും. കഴിഞ്ഞ വർഷം 6 ലക്ഷത്തിലധികം മൺവിളക്കുകൾ കത്തിച്ച് ലോക റെക്കോർഡ് സ്ഥാപിച്ചിരുന്നു.
ഈ വർഷം സരയൂ നദിയുടെ തീരത്ത് 9 ലക്ഷം വിളക്കുകളും ക്ഷേത്രനഗരമായ അയോധ്യയ്ക്ക് ചുറ്റും 3 ലക്ഷം ദീപങ്ങളും തെളിയിക്കും. രാംലീലയുടെ അരങ്ങേറ്റവും ലേസർ ഷോയ്‌ക്കൊപ്പം 3ഡി ഹോളോഗ്രാഫിക് ഡിസ്‌പ്ലേയും ഉൾപ്പെടുന്ന അഞ്ച് ദിവസത്തെ പരിപാടിയാണ് അയോധ്യയിൽ സംഘടിപ്പിക്കുന്നത്.
നവംബർ 1 ന് ആഘോഷങ്ങൾ ആരംഭിക്കും, നവംബർ 3 ന് വൈകുന്നേരം 6 മുതൽ 6:30 വരെ ദീപങ്ങൾ തെളിക്കും. ശ്രീലങ്കയിൽ നിന്നുള്ള ഒരു സാംസ്കാരിക സംഘത്തെയും രാംലീല അവതരിപ്പിക്കാൻ ക്ഷണിച്ചിട്ടുണ്ടെന്നും നവംബർ 1 മുതൽ 5 വരെ മറ്റ് സാംസ്കാരിക പരിപാടികൾ ഉണ്ടാകുമെന്നും സർക്കാർ പുറത്തിറക്കിയ പ്രസ്താവനയിൽ പറയുന്നു.
ആദ്യ ദിവസം തിങ്കളാഴ്ച, നേപ്പാളിലെ ജനക്പൂരിൽ നിന്നുള്ള ഒരു സംഘം രാംലീല അവതരിപ്പിക്കും. ജമ്മു കശ്മീർ, ഗുജറാത്ത്, അസം, കർണാടക, പശ്ചിമ ബംഗാൾ എന്നിവിടങ്ങളിൽ നിന്നുള്ള ടീമുകളും അഞ്ച് ദിവസത്തെ ആഘോഷങ്ങളിൽ രാംലീലകൾ അവതരിപ്പിക്കും.
ജില്ലയിലെ രാം കഥാ പാർക്കിലെ പുഷ്പക വിമാനത്തിൽ (ചോപ്പർ) നിന്ന് പ്രതീകാത്മക ഭഗവാൻ രാമനെയും ലക്ഷ്മണനെയും സീതയെയും മുഖ്യമന്ത്രി യോഗി ആദിത്യനാഥും ഗവർണർ ആനന്ദി ബെൻ പട്ടേലും സ്വീകരിക്കുമെന്ന് അയോധ്യ ജില്ലാ മജിസ്‌ട്രേറ്റ് നിതീഷ് കുമാർ പറഞ്ഞു. മുഖ്യമന്ത്രി ആദിത്യനാഥും അന്ന് സരയൂ ആരതി നടത്തും.