തൃശൂര്: വികസന പ്രവര്ത്തനങ്ങള്ക്ക് എം.പി ഫണ്ടില് നിന്ന് തൃശുര് കോര്പ്പറേഷന് ഒരുകോടി രൂപ അനുവദിച്ച സുരേഷ്ഗോപിക്ക് നന്ദിയറിയിച്ച് തൃശൂര് മേയര് എം.കെ വര്ഗീസിന്റെ കത്ത് സോഷ്യല് മീഡിയയില് വൈറല്.
എല്.ഡി.എഫ് ഭരിക്കുന്ന കോര്പ്പറേഷനില് വികസന പ്രവര്ത്തനങ്ങള് നടത്താനാണ് ഫണ്ട് അനുവദിച്ചത്. ശക്തന് തമ്പുരാന് നഗറിലെ പച്ചക്കറി-മീന് മാര്ക്കറ്റ് കോംപ്ലക്സുകളുടെ സമഗ്ര വികസനത്തിനുള്ള പ്രോജക്ട് കോര്പ്പറേഷന് തയാറാക്കി സുരേഷ്ഗോപിക്ക് അയച്ചിട്ടുണ്ടെന്നും മേയര് കത്തില് പറയുന്നു. തൃശൂരിനോട് കാണിക്കുന്ന സ്നേഹത്തിനും പരിഗണനയ്ക്കും നന്ദി പറഞ്ഞാണ് കത്ത് അവസാനിപ്പിക്കുന്നത്. സുരേഷ്ഗോപിയാണ് കത്ത് ഫേസ്ബുക്കില് പങ്കുവച്ചത്.
2019ലെ ലോക്സഭാ തെരഞ്ഞടുപ്പിലും കഴിഞ്ഞ നിയമസഭ തെരഞ്ഞെടുപ്പിലും തൃശൂര് മണ്ഡലത്തില് സുരേഷ്ഗോപി മത്സരിച്ചിരുന്നു. ലോക്സഭാ തിരഞ്ഞെടുപ്പിനിടെ ”എനിക്ക് ഈ തൃശൂര് വേണം….നിങ്ങളെനിക്ക് ഈ തൃശൂര് തരണം… ഈ തൃശൂര് ഞാനിങ്ങെടുക്കുവാ” എന്നീ ഡയലോഗുകള് ഏറെ ട്രോളുകള്ക്കിരയായിരുന്നു.