വട്ടിയൂര്ക്കാവ് വികസനത്തിന് 5 കോടി
തിരുവനന്തപുരം : വട്ടിയൂര്ക്കാവ് നിയോജക മണ്ഡലത്തില് അഞ്ചു കോടി മൂന്നു ലക്ഷം രൂപയുടെ പ്രവൃത്തികള്ക്ക് ഭരണാനുമതി ലഭിച്ചെന്ന് വി.കെ. പ്രശാന്ത് എംഎല്എ. ജവഹര് നഗറിലെ റോഡുകള് നവീകരിക്കുന്നതിനായി ഒരു കോടി അറുപത് ലക്ഷം രൂപയും പ്ലാമൂട് തേക്കുമ്മൂട് മുളവന റോഡ് ബിഎം ആന്ഡ് ബിസി നിലവാരത്തിലാക്കുന്നതിന് ഒന്നര കോടി രൂപയുമാണ് അനുവദിച്ചിട്ടുള്ളത്. തമ്പുരാന്മുക്ക് ജനറല് ആശുപത്രി റോഡിനും എംഎല്എ ഹോസ്റ്റല് കുന്നുകഴി റോഡിനും 25 ലക്ഷം രൂപ വീതം അനുവദിച്ചു.
എംഎല്എ യുടെ ആസ്തി വികസന ഫണ്ടില് നിന്നും 14 ലക്ഷം രൂപ പാതിരപ്പള്ളി സാംസ്കാരിക നിലയത്തിന്റെ പൂര്ത്തീകരണത്തിനായി അനുവദിച്ചു. എംഎല്എ ഫണ്ടില് നിന്നും 25 ലക്ഷം രൂപ ചെലവഴിച്ച് നിര്മിച്ച കെട്ടിടത്തിന്റെ രണ്ടാം നിലയും ചുറ്റുമതിലും പണിയുന്നതിനാണ് തുക അനുവദിച്ചിരിക്കുന്നത്. എംഎല്എയുടെ പ്രത്യേക വികസന ഫണ്ടില് നിന്നും 19 ലക്ഷം രൂപ വൈലോപ്പിള്ളി സംസ്ക്കൃതി ഭവനിലെ റോഡ് ടാര് ചെയ്യുന്നതിനും 10 ലക്ഷം രൂപ പട്ടം മോഡല് ഗേള്സ് ഹയര് സെക്കന്ഡറി സ്കൂളിന് കംപ്യൂട്ടര് വാങ്ങാനും അനുവദിച്ചു.
കാലവര്ഷ കെടുതികളില് തകര്ന്ന 10 റോഡുകളുടെ പുനര്നിര്മാണത്തിനായി ഒരു കോടി രൂപയുടെ ഭരണാനുമതി ലഭിച്ചു. മണ്ഡലത്തിലെ മരാമത്ത് പ്രവൃത്തികളുടെ പുരോഗതി കൃത്യമായി വിലയിരുത്തുന്നുണ്ടന്നും സമയബന്ധിതമായി ഗുണമേന്മയോടു കൂടി പ്രവൃത്തികള് നിര്വഹിക്കപ്പെടുന്നത് ഉറപ്പാക്കുമെന്നും എംഎല്എ പറഞ്ഞു.