ലുലു എക്സ്ചേഞ്ചും ബെനിഫിറ്റ് പേയും കൈകോര്ക്കുന്നു
മനാമ: നാട്ടിലേക്ക് പണം അയക്കുന്നതിനും കറന്സി വിനിമയത്തിനും ലുലു എക്സ്ചേഞ്ചും ബെനിഫിറ്റ് പേയും കൈകോര്ക്കുന്നു. ലുലു എക്സ്ചേഞ്ചിന്റെ ബഹ്റൈനിലെ 16 ശാഖകള് വഴി ബെനിഫിറ്റ് പേ അക്കൗണ്ട് ഉപയോഗിച്ച് പണമയക്കാനുള്ള സംവിധാനമാണ് ഏര്പ്പെടുത്തിയിരിക്കുന്നത്.
ബ്രാഞ്ചിലെ കൗണ്ടറില് സ്ഥാപിച്ചിട്ടുള്ള ക്യൂ.ആര് കോഡ് സ്കാന് ചെയ്താല് ബെനിഫിറ്റ് പേ അക്കൗണ്ട് വഴി ഇടപാട് നടത്താം. ബ്രാഞ്ചിലെ ടെല്ലറുടെ സാന്നിധ്യത്തില് ഇടപാട് നടത്തുന്നതിനാല് സുരക്ഷിതമായി പണമയക്കാന് സാധിക്കും. ബഹ്റൈനിന്റെ ഡിജിറ്റല്വത്കരണത്തിന് പിന്തുണ നല്കുന്നതാണ് പുതിയ സംവിധാനമെന്ന് ലുലു എക്സ്ചേഞ്ച് ജനറല് മാനേജര് എഡിസണ് ഫെര്ണാണ്ടസ് പറഞ്ഞു.
അഞ്ച് ലക്ഷത്തോളം ഉപയോക്താക്കളാണ് ബഹ്റൈനില് ബെനിഫിറ്റ് പേയ്ക്കുള്ളത്. കാഷ്ലെസ് ഇടപാടുകള് ആഗ്രഹിക്കുന്നവര്ക്ക് ഏറെ പ്രയോജനകരമാണ് ഈ സംവിധാനമെന്നും അദ്ദേഹം കൂട്ടിച്ചേര്ത്തു. ലുലു എക്സ്ചേഞ്ചുമായി സഹകരിക്കുന്നതില് സന്തോഷമുണ്ടെന്ന് ബെനിഫിറ്റ് പേ ഡെപ്യൂട്ടി ചീഫ് എക്സിക്യൂട്ടിവ് യൂസഫ് അല് നെഫായി പറഞ്ഞു.