ഏഷ്യന് കപ്പ് : കുവൈത്ത്, നേപ്പാള് മത്സരം ഇന്ന്
കുവൈത്ത് സിറ്റി: ഏഷ്യന് കപ്പ് ഫുട്ബാള് യോഗ്യത മത്സരത്തില് കുവൈത്ത് ശനിയാഴ്ച നേപ്പാളിനെ നേരിടും. ആദ്യ മത്സരത്തില് ഇന്തോനേഷ്യയോട് തോറ്റ കുവൈത്തിന് നേപ്പാളിനോട് ജയിച്ചേ പറ്റൂ. മറ്റൊരു മത്സരത്തില് പോയന്റ് നിലയില് ഓരോ ജയവുമായി മുന്നിലുള്ള ജോര്ഡന് ഇന്തോനേഷ്യയെ നേരിടും. ഗ്രൂപ്പിലെ ഒരു ടീമാണ് ഏഷ്യന് കപ്പിന് നേരിട്ട് യോഗ്യത നേടുക.
കുവൈത്തിനും നേപ്പാളിനും പോയന്റൊന്നുമില്ല. എല്ലാ ഗ്രൂപ്പുകളില്നിന്നുമായി മികച്ച അഞ്ച് രണ്ടാം സ്ഥാനക്കാരും യോഗ്യത നേടുമെന്നതിനാല് ഗോള്നിലപോലും പ്രധാനമാണ്. കുവൈത്തിന്റെ അടുത്ത മത്സരം കരുത്തരായ ജോര്ഡനെതിരെ ആയതിനാല് മികച്ച ഗോള് ശരാശരിയില് നേപ്പാളിനെതിരെ ജയിക്കേണ്ടത് കുവൈത്തിനെ സംബന്ധിച്ചിടത്തോളം അനിവാര്യമാണ്.