ആഘോഷങ്ങള് സൗഹാര്ദങ്ങളാകുന്നു; സഖാഫി
കുവൈത്ത് സിറ്റി: ഈദ് ഉള്പ്പെടെ ആഘോഷവേളകള് മുഴുവന് ജനവിഭാഗങ്ങള്ക്കിടയിലുമുള്ള സൗഹാര്ദം ഊട്ടിയുറപ്പിക്കാനുള്ള അവസരങ്ങളായി ഉപയോഗപ്പെടുത്തണമെന്ന് ഐ.സി.എഫ് ഇന്റര്നാഷനല് ദഅവ സെക്രട്ടറി അലവി സഖാഫി തെഞ്ചേരി പറഞ്ഞു. ബലി പെരുന്നാള് ദിനത്തില് കുവൈത്ത് നാഷനല് ഐ.സി.എഫ് അബ്ബാസിയ പോപ്പിന്സ് ഹാളില് സംഘടിപ്പിച്ച സുഹൃദ് സംഗമം ഉദ്ഘാടനം ചെയ്യുകയായിരുന്നു അദ്ദേഹം.
മതഭേദങ്ങളില്ലാത്ത അയല്പക്ക ബന്ധങ്ങളുടെ ഊഷ്മളമായ ഓര്മകളാണ് പെരുന്നാള് ദിവസങ്ങളുടെ സവിശേഷതയെന്നും പ്രതിസന്ധികള് അഭിമുഖീകരിക്കേണ്ടിവരുന്ന ജീവിതഘട്ടങ്ങളില് സംയമനവും ത്യാഗസന്നദ്ധതയും പുലര്ത്തുന്നതിന് എക്കാലത്തുമുള്ള വിശ്വാസിസമൂഹത്തിന് പ്രചോദനമേകുന്നതാണ് ഇബ്രാഹീം നബിയും കുടുംബവും നയിച്ച സമര്പ്പിത ജീവിതമെന്നും അദ്ദേഹം കൂട്ടിച്ചേര്ത്തു. ഐ.സി.എഫ് കുവൈത്ത് നാഷനല് പ്രസിഡന്റ് അബ്ദുല് ഹകീം ദാരിമി അധ്യക്ഷത വഹിച്ചു. സാലിഹ് കിഴക്കേതില് ഈദ് സന്ദേശപ്രഭാഷണം നടത്തി. സജീവ് നാരായണന്, ശൈലേഷ്, അഹ്മദ് കെ. മാണിയൂര് എന്നിവര് സംസാരിച്ചു.