![“Manju”](https://santhigirinews.org/wp-content/uploads/2020/04/YOUTUBE.jpg")
ജിദ്ദ: ജിദ്ദയിലെ ചേരി വികസന പദ്ധതിയുടെ ഏറ്റവും പുതിയ പ്രവര്‍ത്തനങ്ങള്‍ മക്ക ഗവര്‍ണര്‍ അമീര്‍ ഖാലിദ് അല്‍ഫൈസല്‍ വിലയിരുത്തി. ഗവര്‍ണറേറ്റ് ആസ്ഥാനത്ത് ജിദ്ദ മേയര്‍ സ്വാലിഹ് അല്‍തുര്‍ക്കിയുമായുള്ള കൂടിക്കാഴ്ചയിലാണ് വിശദ ചര്‍ച്ച നടത്തിയത്. അണ്ടര്‍ സെക്രട്ടറി ഡോ. മുഷബിബ് അല്‍ഖഹ്താനി കൂടിക്കാഴ്ചയില്‍ പങ്കെടുത്തു. പദ്ധതിയുടെ പ്രവര്‍ത്തന പുരോഗതി വിശദീകരിച്ചു. 64 ചേരികളെ സമയബന്ധിതമായി വികസിപ്പിക്കുന്നതിനുള്ള പ്രവര്‍ത്തന പദ്ധതികളാണ് ജിദ്ദ ചേരി വികസന സമിതി ആവിഷ്കരിച്ചിരിക്കുന്നത്. ആദ്യഘട്ടത്തില്‍ പദ്ധതിയില്‍ 32ഉം രണ്ടാംഘട്ടത്തില്‍ 32ഉം ചേരിപ്രദേശങ്ങളാണ് വികസിപ്പിക്കുന്നത്. കഴിഞ്ഞ ഒക്ടോബറിലാണ് കെട്ടിടങ്ങള്‍ നീക്കം ചെയ്യാന്‍ ആരംഭിച്ചത്. ചേരിപ്രദേശ ഉടമകളുടെയും താമസക്കാരുടെയും സഹകരണത്തോടെ 28 അയല്‍ക്കൂട്ടങ്ങള്‍ നീക്കം ചെയ്യുന്ന ജോലികള്‍ പൂര്‍ത്തിയായിട്ടുണ്ട്. അല്‍മുന്‍തസഹാത്, ഖുവൈസ, അല്‍അദ്ല്‍, അല്‍ഫദ്ല്‍, ഉമ്മുല്‍ സുലൈം, കിലോ 14 നോര്‍ത്ത് എന്നീ നാല് ചേരിപ്രദേശങ്ങള്‍ മാത്രമേ ഇനി പൊളിച്ചുനീക്കം ചെയ്യാന്‍ അവശേഷിക്കുന്നുള്ളൂ. ഇവിടങ്ങളിലെ പൊളിച്ചുനീക്കല്‍ ജോലികള്‍ ഒക്ടോബര്‍ അവസാനത്തോടെ പൂര്‍ത്തിയാകുമെന്നാണ് പ്രതീക്ഷിക്കുന്നതെന്നും അധികൃതര്‍ അറിയിച്ചു.
