മെല്ബണ്: വിഡിയോ ഗെയിം കളിക്കുന്നത് ഹൃദ്രോഗസാധ്യതയുള്ള കുട്ടികളുടെ ജീവന്തന്നെ അപകടത്തിലാക്കിയേക്കാമെന്ന് പുതിയ പഠനം. ഇലക്ട്രോണിക് വിഡിയോ ഗെയിമുകള് ഹൃദയതാളം തെറ്റിക്കുകയോ ക്രമരഹിതമായ ഹൃദയമിടിപ്പിനോ ഇടയാക്കിയേക്കാം. അതിനാല്, അപകടകരമായ വേഗത്തില് ഹൃദയതാളമുള്ള കുട്ടികള്ക്ക് കായിക വിനോദങ്ങള്ക്ക് പകരമുള്ള വിനോദോപാധിയല്ല വിഡിയോ ഗെയിമെന്നും ഗവേഷണം വ്യക്തമാക്കുന്നു.
ആസ്ട്രേലിയയിലെ സിഡ്നി ചില്ഡ്രന്സ് ഹോസ്പിറ്റല്സ് നെറ്റ്വര്ക്കിലെ ദ ഹെല്ത്ത് സെന്റര് ഫോര് ചില്ഡ്രനില് നിന്നുള്ള ക്ലെയര് എം. ലോലിയുടെ നേതൃത്വത്തില് നടത്തിയ പഠനം അടുത്തിടെ ഹാര്ട്ട് റിഥം ജേണലിലാണ് പ്രസിദ്ധീകരിച്ചത്. ഇലക്ട്രോണിക് ഗെയിമിനിടെ പെട്ടെന്ന് ബോധം നഷ്ടപ്പെടുന്ന കുട്ടികളെ ഹൃദ്രോഗ വിദഗ്ധന് വിലയിരുത്തണം. കാരണം ഇത് ഗുരുതരമായ ഹൃദയ പ്രശ്നത്തിന്റെ ആദ്യ ലക്ഷണമാകാം –ലോലി പറഞ്ഞു. കുടുംബങ്ങളും ആരോഗ്യവിദഗ്ധരും അപകടകരമായ വേഗത്തില് ഹൃദയമിടിപ്പുള്ള കുട്ടികളുടെ ഗെയിം സംബന്ധിച്ച് സുരക്ഷ മുന്കരുതലുകളെടുക്കണം. പഠനവിധേയമാക്കിയ 22 സംഭവങ്ങളില് പലര് ചേര്ന്ന് കളിക്കുന്ന വാര് ഗെയിമുകളാണ് ഏറ്റവും അപകടകാരിയെന്ന് കണ്ടെത്തി. ഏഴിനും പതിനാറിനും ഇടയില് പ്രായമുള്ള രോഗികളെ ഉള്പ്പെടുത്തിയാണ് പഠനം നടത്തിയത്. ചില കുട്ടികള് ഹൃദയസ്തംഭനത്തെ തുടര്ന്ന് മരിച്ചതായും വ്യക്തമാക്കുന്നു. വിഡിയോ ഗെയിമിനിടെ ബോധം നഷ്ടപ്പെട്ട കുട്ടികളില് നടത്തിയ ഗവേഷണത്തില് പല കുടുംബാംഗങ്ങള്ക്കും രോഗമുള്ളതായി തെളിഞ്ഞു. ഹൃദ്രോഗ സമയത്ത്, രോഗികളില് പലരും ആവേശഭരിതരായിരുന്നു. ഇലക്ട്രോണിക് ഗെയിമുകള് വൈകാരികമായി നാഡീവ്യവസ്ഥയെ ഉത്തേജിപ്പിക്കുന്നതാണ് ഇതിന് കാരണമെന്നും വ്യക്തമാക്കുന്നു.