കാലുമാറി ശസ്ത്രക്രിയ; പ്രാഥമിക അന്വേഷണം ആരംഭിച്ചു
കോഴിക്കോട്: നാഷണല് ആശുപത്രിയില് കാലുമാറി ശസ്ത്രക്രിയ നടത്തിയെന്ന പരാതിയില് അന്വേഷണം ആരംഭിച്ച് നടക്കാവ് പോലീസ്. കക്കോടി സ്വദേശിനി സജ്നയുടെ ഇടതുകാലിന് പകരം വലതു കാലില് ശസ്ത്രക്രിയ നടത്തിയെന്നാണ് ഉയരുന്ന പരാതി. ആരോഗ്യ മന്ത്രിക്കും ഡി.എം.ഒ യ്ക്കും കുടുംബം പരാതി നല്കിയിട്ടുണ്ട്. നടക്കാവ് പോലീസിന്റെ സഹായത്തോടെ നാഷണല് ആശുപതിയില് നിന്നും ഡിസ്ചാര്ജ് ചെയ്ത സജ്നയെ തുടര് ചികിത്സയ്ക്കായി കോഴിക്കോട് മെഡിക്കല് കോളേജ് ആശുപത്രിയില് പ്രവേശിപ്പിച്ചു.
ഒരു വര്ഷം മുന്പ് വാതിലില് കുടുങ്ങിയാണ് സജ്നയുടെ വലതുകാലിന്റെ ഞെരമ്ബിന് പരിക്കുപറ്റിയിരുന്നു. ശസ്ത്രക്രിയ വേണമെന്ന നിര്ദേശത്തിന്റെ അടിസ്ഥാനത്തില് തിങ്കളാഴ്ച ആശുപത്രിയില് പ്രവേശിപ്പിച്ചു. ശസ്ത്രക്രിയയ്ക്ക് മുന്നോടിയായി ഇടത് കാലിന്റെ പരിശോധന നടത്തി ഇന്നലെ അനസ്തേഷ്യ നല്കി. ബോധം തെളിഞ്ഞപ്പോഴാണ് കാലുമാറിയ കാര്യം സജ്ന അറിയുന്നത്. വീഴ്ച പറ്റിയെന്ന് ഡോക്ടര് സമ്മതിച്ചെന്ന് മകള് വ്യക്തമാക്കുന്നു.
എന്നാല് ഈ ആരോപണങ്ങള് ആശുപത്രി അധികൃതരും ശസ്ത്രക്രിയ നടത്തിയ അസ്തിരോഗ വിദഗ്ധനും തള്ളി. വലത് കാലിന് ഭാഗികമായി തകരാറുണ്ടായിരുന്നുവെന്ന് ഡോ.ബഹിര്ഷാന് വ്യക്തമാക്കുന്നു. ചെറിയ പ്രശ്നം ആദ്യം പരിഹരിച്ച ശേഷം രണ്ടാമത് ഇടത് കാലിലെ വലിയ പ്രശ്നം പരിഹരിക്കാമെന്ന് കരുതിയെന്നും ഡോക്ടര് പറയുന്നു. കുടുംബത്തോട് കാര്യങ്ങള് പറഞ്ഞിരുന്നുവെന്നും അവര്ക്ക് മനസിലാകാത്തതാണെന്നും ബഹിര്ഷാന് പറഞ്ഞു.