നിപ സംശയം: റിസള്‍ട്ട് വന്നതിനുശേഷം മാത്രമേ സ്ഥിരീകരിക്കാന്‍ ക‍ഴിയൂ

കോ‍ഴിക്കോട് നിപ വൈറസ് ബാധയുണ്ടോയെന്ന സംശയത്തില്‍ പ്രതികരണവുമായി ആരോഗ്യമന്ത്രി വീണാ ജോര്‍ജ്ജ്. ജില്ലയില്‍ രണ്ട് അസ്വാഭിക പനി മരണങ്ങള്‍ ഉണ്ടായി. നിപ ആണെന്നത് സംശയം മാത്രമാണ്. പൂനെയിൽ നിന്ന് റിസൽട്ട് വന്നതിന്ശേഷം മാത്രമെ സ്ഥിരികരിക്കാൻ കഴിയുള്ളുവെന്നും ഹൈറിസ്ക്ക് സമ്പർക്കപട്ടിക തയ്യാറാക്കുകയാണെന്നും വീണാ ജോര്‍ജ്ജ് അറിയിച്ചു.

അതേസമയം, നിപ സംശയത്തെ തുടർന്ന് ജില്ലയിലെ ആയഞ്ചേരി, മരുതോങ്കര പഞ്ചായത്തുകളിൽ സ്കൂളുകൾക്കും അങ്കണവാടികൾക്കും അവധി പ്രഖ്യാപിച്ചു. 10.30 ന് ആയഞ്ചേരി പഞ്ചായത്തിൽ അടിയന്തര യോഗം വിളിച്ചിട്ടുണ്ട്. പഞ്ചായത്തിലെ മുഴുവൻ വിദ്യാഭ്യാസ സ്ഥാപനങ്ങളിലെ പ്രധാന അധ്യാപകരെയും യോഗത്തിലേക്ക് വിളിച്ചിട്ടുണ്ട്. ആയഞ്ചേരി 13-ാം വാർഡായ മംഗലാടാണ് നിപ ആശങ്ക നിലനിൽക്കുന്നത്.