ബോളിവുഡ് താരം മെഹമൂദ് ജൂനിയർ അന്തരിച്ചു

മുംബൈ: തന്റേതായ ശൈലിയിലൂടെ സിനിമാ പ്രേമികളെ ഒന്നടങ്കം പൊട്ടിച്ചിരിപ്പിച്ച പ്രശസ്ത ബോളിവുഡ് നടനും ​ഗായകനുമായ മെഹമൂദ് ജൂനിയർ (67) അന്തരിച്ചു. അര്‍ബുദബാധിതനായിരുന്നു. മെഹമൂദ് ജൂനിയറിന്റെ മരണവാർത്ത അടുത്ത സുഹൃത്തായ സലാം കാസി സ്ഥിരീകരിച്ചു. ഒരുമാസം മുമ്പാണ് സംവിധായകൻകൂടിയായ താരത്തിന് അർബുദമാണെന്ന് കണ്ടെത്തിയത്. പക്ഷേ അപ്പോഴേക്കും രോ​ഗം ശ്വാസകോശത്തേയും മറ്റ് ആന്തരികാവയവങ്ങളേയും ബാധിച്ചിരുന്നു. നാല്പത് ദിവസങ്ങൾ കൂടിയേ മെഹമൂദ് ജീവിച്ചിരിക്കൂ എന്ന് ഡോക്ടർമാർ പറഞ്ഞിരുന്നതായും സലാം കാസി പറഞ്ഞു.

ഏഴു ഭാഷകളിലായി 250-ലേറെ ചിത്രങ്ങളിൽ അഭിനയിച്ചിട്ടുണ്ട് മെഹമൂദ് ജൂനിയർ. ആറ് മറാഠി ചിത്രങ്ങൾ നിർമിക്കുകയും സംവിധാനംചെയ്യുകയും ചെയ്തു. നയീം സയ്യിദ് എന്നാണ് യഥാർത്ഥ പേര്. 1967-ൽ പുറത്തിറങ്ങിയ നൗനിഹാലിൽ ബാലതാരമായാണ് സിനിമാജീവിതം തുടങ്ങിയത്. കാരവൻ, ജുദായി, ദാദാ​ഗിരി, ഹാഥി മേരേ സാഥി, മേരാ നാം ജോക്കർ തുടങ്ങിയവയാണ് ശ്രദ്ധേയമായ ചില ചിത്രങ്ങൾ.
പ്യാർ കാ ദർദ് ഹേ മീഠാ മീഠാ പ്യാരാ പ്യാരാ, ഏക് റിഷ്താ സഝേധാരി കാ, തെനാലി രാമ എന്നീ ടെലിവിഷൻ പരമ്പരകളിലും അഭിനയിച്ചിട്ടുണ്ട്.