സ്റ്റാഫ് റിപ്പോര്ട്ടര്
ഷൊര്ണൂര്: കാലവര്ഷം ആരംഭിച്ച് രണ്ട് മാസത്തെ കാത്തിരിപ്പിനൊടുവില് നിള നദി പരന്നൊഴുകാന് തുടങ്ങി. ഇടവപ്പാതിയും മതിമറന്ന് പെയ്യേണ്ട മകീര്യം, തിരുമുറിയാതെ പെയ്യുന്ന തിരുവാതിര അടക്കമുള്ള ഞാറ്റുവേലകളൊക്കെ കഴിഞ്ഞുപോയിട്ടും പുഴ മിക്കയിടത്തും വരണ്ട് കിടക്കുകയായിരുന്നു ഇതുവരെ. കര്ഷകരൊക്കെ പ്രാര്ത്ഥനയിലായിരുന്നു.. ഇപ്പോഴിതാ മാനം കറുത്തു നിള പൂത്തു…
പുഴയിലേക്ക് നീരൊഴുകിയെത്തുന്ന തോടുകളും കൈവഴികളുമെല്ലാം വെള്ളമില്ലാതെ ഒഴുകാന് മടിപിടിച്ച് കിടക്കുകയായിരുന്നു. കര്ക്കടകം പോകാറായപ്പോഴാണ് മഴ മനം നിറഞ്ഞ് കനത്ത് ഭാരതപ്പുഴ ജലസമൃദ്ധമായത്. പ്രളയക്കെടുതിയെ ഭയമാണെങ്കിലും നിറഞ്ഞൊഴുകുന്ന പുഴയുടെ സൗന്ദര്യം പ്രകൃതി സ്നേഹികള്ക്കെന്നും ഉള്പ്പുളകമാണ്. അത്രയേറെ കാഴ്ച്ച ഭംഗിയുണ്ട് കരകവിഞ്ഞൊഴുകാന് വെമ്പി നില്ക്കുന്ന നിളയ്ക്ക്.