ഐ.ടി രംഗത്ത് വിസ്മയം തീര്ത്ത് ഇഷല്
വണ്ടൂര്: മൊബൈലില് ഗെയിം കളിച്ചിരിക്കേണ്ട പ്രായത്തില് കൗണ്സലിങ് ആപ് അടക്കം നിര്മിച്ച് വിസ്മയം സൃഷ്ടിക്കുകയാണ് നിലമ്പൂര് ചക്കാലക്കുത്തിലെ നാലാം ക്ലാസുകാരി. ഗെയിമടക്കമുള്ള ആപ്പുകള് നിര്മിച്ച് സ്വന്തമായി പ്ലേസ്റ്റോറുണ്ടാക്കിയ കുന്നത്ത് പറമ്പന് ഷാഹിദ് -ആയിഷ സമീഹ ദമ്പതികളുടെ മൂത്ത മകളായ ഇഷല് ആണ് ചെറുപ്രായത്തില് ഐ.ടി രംഗത്ത് വിസ്മയമാകുന്നത്. ഇശല്സ് പ്ലേ (Eshals Play) എന്ന് പേരിട്ടിട്ടുള്ള പ്ലേസ്റ്റോറില് ഗെയിമുകളടക്കം അറുപതിലധികം ആപ്പുകളുണ്ട്. മിക്കതും സഹോദരങ്ങളായ അയ്ഹമിനും ഫാത്തിമക്കും വേണ്ടി നിര്മിച്ചതാണ്. അനേകം വെബ്സൈറ്റുകളും നിര്മിച്ചിട്ടുണ്ട്. ഇശലിന്റെ മാതാപിതാക്കള് വിദ്യാഭ്യാസ രംഗത്ത് സ്റ്റാര്ട്ടപ് സംരംഭവുമായി സജീവമാണ്.
കഴിഞ്ഞ വര്ഷമാണ് ബി.ടെക് ബിരുദധാരി കൂടിയായ മാതാവ് ആയിഷ സമീഹ തന്റെ ഒഴിവുവേളയില് ഇഷലിന് ആപ്ലിക്കേഷന് നിര്മാണവുമായി ബന്ധപ്പെട്ട കോഡിങ് പരിചയപ്പെടുത്തിയത്. സോഫ്റ്റ്വെയറിന്റെ ബെയ്സ് പരിചയപ്പെടുത്തുക എന്ന ലക്ഷ്യം മാത്രമാണ് അന്ന് ആയിഷക്കുണ്ടായിരുന്നത്. എന്നാല്, ഇഷല് ഈ രംഗത്ത് വേറിട്ട പ്രകടനം കാഴ്ചവെക്കുകയായിരുന്നു. ഗൂഗിൾ വഴി ഫ്രീയായുള്ള ആപ് ഡെവലപ്മെന്റ് പ്ലാറ്റ്ഫോം വഴിയാണ് ഗെയിമടക്കമുള്ള അപ്പുകള് നിര്മിക്കുന്നത്. നിലമ്പൂര് പീവീസ് മോഡല് സ്കൂളില് നാലാം ക്ലാസ് വിദ്യാര്ഥിയായ ഇഷലിന് ഭാവിയില് ആര്ട്ടിസ്റ്റാകാനാണ് താല്പര്യം. ചെറിയ മാറ്റം വരുത്തി താന് നിര്മിച്ച ആപ്പുകള് ഗൂഗ്ള് പ്ലേ സ്റ്റോറില് നല്കാനുള്ള തീരുമാനത്തിലാണ് ഇഷല്.