ശ്രീജ.എസ്
കര്ണാടകയില് ഘട്ടം ഘട്ടമായി സ്കൂള് തുറക്കാന് നിര്ദേശം .ഒന്നാം ക്ലാസ് ഉള്പ്പെടെ പ്രൈമറി ക്ലാസുകളിലെ വിദ്യാര്ഥികളുടെ പ്രവേശന നടപടികള് സംബന്ധിച്ച് സര്ക്കാര് ഇതുവരെ വ്യക്തത നല്കിയിട്ടില്ലെന്നു ചൂണ്ടിക്കാട്ടി സമര്പ്പിച്ച പൊതുതാല്പര്യ ഹരജി പരിഗണിച്ചാണ് ഹൈകോടതി നിര്ദേശം. സ്കൂളുകള് തുറക്കുന്നതിനും സര്ക്കാര് നടപടി സ്വീകരിച്ചിട്ടില്ലെന്നും ഹരജിയിലൂടെ കോടതിയെ അറിയിച്ചു.
കോവിഡ് കേസുകള് തീരെ കുറവുള്ള താലൂക്കുകളിലെ സ്കൂളുകള് ആദ്യവും അടുത്ത ഘട്ടമായി മറ്റു സ്കൂളുകളും തുറക്കാനാണ് ജസ്റ്റിസ് ബി.വി. നാഗരത്ന, നടരാജ് രംഗസ്വാമി എന്നിവര് ഉള്പ്പെട്ട ഡിവിഷന് ബെഞ്ച് നിര്ദേശം നല്കിയത്.എല്ലാ സ്കൂളുകളും ഒന്നിച്ച് തുറക്കുന്നതിന് പകരം ഓരോ സ്ഥലത്തെയും സാഹചര്യം പരിശോധിച്ച് ആവശ്യമായ തുടര്നടപടികള് സംസ്ഥാന സര്ക്കാറിന് സ്വീകരിക്കാമെന്നും കോടതി അഭിപ്രായപ്പെട്ടു.