ന്യൂഡല്ഹി: കാര്ഷിക നിയമങ്ങളുമായി ബന്ധപ്പെട്ട പ്രശ്നങ്ങള് പഠിക്കാന് സുപ്രീംകോടതി നിയോഗിച്ച നാലംഗ സമിതിയില്നിന്നു കര്ഷകസംഘടനാ നേതാവായ ഭൂപീന്ദര് സിംഗ് മന് പിന്മാറി. കേന്ദ്രസര്ക്കാര് കൊണ്ടുവന്ന കാര്ഷിക നിയമങ്ങളെ അനുകൂലിക്കുന്നവരാണ് സമിതിയംഗങ്ങളെന്നു വ്യാപകമായി ആരോപണം ഉയര്ന്നിരിക്കേയാണ് ഭാരതീയ കിസാന് യൂണിയന്റെയും ഓള് ഇന്ത്യ കിസാന് കോ–ഓര്ഡിനേഷന് കമ്മിറ്റിയുടെയും പ്രസിഡന്റായ ഭൂപീന്ദര് സിംഗ് മന് പിന്മാറിയത്.
കര്ഷകരുടെയും ജനങ്ങളുടെയും വികാരം പരിഗണിച്ചാണ് പിന്മാറ്റ തീരുമാനമെന്ന് അറിയിച്ച ഭൂപീന്ദര് മന്, പഞ്ചാബിന്റെയോ കര്ഷകരുടെയോ താത്പര്യങ്ങള്ക്കു വിരുദ്ധമായി പ്രവര്ത്തിക്കാന് ആഗ്രഹിക്കുന്നില്ലെന്നും വ്യക്തമാക്കി. ഭൂപീന്ദര് സിംഗ് മന്, അഗ്രിക്കള്ച്ചറല് ഇക്കോണമിസ്റ്റും കമ്മീഷന് ഫോര് അഗ്രിക്കള്ച്ചര് കോസ്റ്റ്സ് ആന്ഡ് പ്രൈസസ് മുന് ചെയര്മാനുമായ അശോക് ഗുലാത്തി, സൗത്ത് ഏഷ്യ ഇന്റര്നാഷണല് ഫുഡ് പോളിസി ഡയറക്ടര് പ്രമോദ് കുമാര് ജോഷി, ശേത്കരി സംഘടന് പ്രസിഡന്റ് അനില് ഘന്വത് എന്നിവരാണ് സുപ്രീംകോടതി നിയമിച്ച സമിതിയിലുള്ളത്.
അപകീര്ത്തി കേള്ക്കേണ്ടി വന്ന ഈ കമ്മിറ്റിയില്നിന്നുള്ള ആദ്യത്തെ പിന്മാറ്റം തങ്ങളുടെ ചെറിയ വിജയമാണെന്നും കര്ഷക സംഘടനാ നേതാക്കള് പ്രതികരിച്ചു. ചില ഭേദഗതികളോടെ കാര്ഷിക നിയമം നടപ്പിലാക്കണമെന്ന് ഭൂപീന്ദര് സിംഗ് മന് കേന്ദ്ര കൃഷിമന്ത്രിയുമായി ഡിസംബറില് നടത്തിയ കൂടിക്കാഴ്ചയില് ആവശ്യപ്പെട്ടിരുന്നു.
ഭാരതീയ കിസാന് യൂണിയന് ഇദ്ദേഹത്തെ പുറത്താക്കിയതാണെന്നും അതിനാലാണ് ഇപ്പോള് സുപ്രീംകോടതി നിര്ദേശിച്ച സമിതിയില്നിന്നു പിന്മാറിയതെന്നും സംയുക്ത് കിസാന് മോര്ച്ച നേതാവ് രജീന്ദര് സിംഗ് ദീപ്സിംഗ് വാല ആരോപിച്ചു.