ശ്രീജ.എസ്
കൊച്ചി: താരസംഘടനയായ ‘അമ്മ’യുടെ സ്വപ്ന മന്ദിരം ഫെബ്രുവരി ആറിന് ഉദ്ഘാടനം ചെയ്യും. എറണാകുളത്ത് കലൂര് ദേശാഭിമാനി റോഡില് മൂന്ന് നിലകളിലായി നിര്മിച്ചിരിക്കുന്ന പുതിയ കെട്ടിടത്തിന്റെ ഉദ്ഘാടനം മമ്മൂട്ടിയും മോഹന്ലാലും ചേര്ന്ന് രാവിലെ പത്തിന് നിര്വഹിക്കും. കോവിഡ് മാനദണ്ഡങ്ങള് പാലിച്ചുകൊണ്ട് നടത്തുന്ന ചടങ്ങില് നൂറ് പേര്ക്കാവും പ്രവേശനം. സംഘടന പ്രവര്ത്തനം ആരംഭിച്ച് 25 വര്ഷങ്ങള് പിന്നിടുമ്പോഴാണ് ആസ്ഥാനമന്ദിരം പൂര്ത്തീകരിച്ചിരിക്കുന്നത്.
2019 നവംബറിലാണ് കെട്ടിടത്തിന്റെ നിര്മാണ പ്രവര്ത്തനങ്ങള് ആരംഭിച്ചത്. ആറ് മാസത്തെ സമയപരിധിയാണ് നിര്മാണം ആരംഭിച്ചപ്പോള് നിശ്ചയിച്ചിരുന്നതെങ്കിലും കോവിഡ് അടക്കമുള്ള പ്രതികൂല സാഹചര്യങ്ങള് മൂലം നിര്മാണം വൈകുകയായിരുന്നു. സംഘടനയുടെ യോഗങ്ങള്ക്ക് ഇനി വേദിയാവുക പുതിയ ആസ്ഥാന മന്ദിരം ആയിരിക്കും. 1994 മെയ് 31ന് തിരുവനന്തപുരം പഞ്ചായത്ത് ഹാളിലാണ് മുതിര്ന്ന നടനായിരുന്ന തിക്കുറുശി സുകുമാരന് നായരുടെ അധ്യക്ഷതയില് അസോസിയേഷന് ഓഫ് മലയാളം മൂവി ആര്ട്ടിസ്റ്റ്സ്(അമ്മ) എന്ന കൂട്ടായ്മയ്ക്കു തുടക്കം കുറിച്ചത്.