ഇ ശ്രീധരൻ വലിയ വ്യക്തി; ഏത് സ്ഥാനവും വഹിക്കാൻ യോഗ്യനെന്ന് മുഖ്യമന്ത്രി

തിരുവനന്തപുരം: ഇ ശ്രീധരൻ വലിയ വ്യക്തിയെന്ന് മുഖ്യമന്ത്രി പിണറായി വിജയൻ. ഇ ശ്രീധരന്റെ ബിജെപി പ്രവേശനവുമായി ബന്ധപ്പെട്ട് മാദ്ധ്യമങ്ങളുടെ ചോദ്യത്തിന് മറുപടി നൽകുകയായിരുന്നു അദ്ദേഹം. അദ്ദേഹത്തിന്റെ ആഗ്രഹങ്ങൾക്ക് അനുസരിച്ച് കാര്യങ്ങൾ നടക്കട്ടെയെന്നും മുഖ്യമന്ത്രി പറഞ്ഞു.

മുഖ്യമന്ത്രി പിണറായി വിജയനെതിരെ രൂക്ഷ വിമർശനമാണ് ഇ ശ്രീധരൻ ഉന്നയിച്ചിരുന്നത്. പിണറായി ഏകാധിപതിയാണെന്നും പത്തിൽ മൂന്ന് മാർക്ക് പോലും അദ്ദേഹത്തിന്റെ ഭരണത്തിന് നൽകാനാകില്ലെന്നും ശ്രീധരൻ പറഞ്ഞിരുന്നു. പിണറായി സർക്കാരിന്റെ തുടർഭരണം കേരളത്തിന് ദുരന്തമാവുമെന്നും അഴിമതിയിൽ മുങ്ങിയ ഭരണമാണ് കേരളത്തിൽ നടക്കുന്നതെന്നും അദ്ദേഹം വിമർശിച്ചിരുന്നു.