അര്ജന്റീന-ബ്രസീല് പോരാട്ടം മുന്നിര്ത്തി കനത്ത പൊലീസ് സുരക്ഷ
ധാക്ക: കോപ്പ അമേരിക്ക ഫൈനലിന് പന്തുരുളുന്നത് മാറക്കാനയിലാണെങ്കിലും ലോകമെമ്ബാടും ആവേശം അലതല്ലുകയാണ്. 14 വര്ഷത്തിന് ശേഷം കോപ്പ ഫൈനലില് അര്ജന്റീനയും ബ്രസീലും ഏറ്റുമുട്ടുന്നതോടെ ആവേശം അതിരുവിടാനും സാധ്യതയുണ്ട്. സംഘര്ഷ സാധ്യത മുന് നിര്ത്തി ബംഗ്ലദേശിലെ ഗ്രാമമായ ബ്രഹ്മാന്ബരിയയില് പൊലീസ് അതീവ ജാഗ്രത സന്ദേശം നല്കിയതാണ് കൗതുകമുണര്ത്തുന്ന വാര്ത്ത.
ധാക്കയില് നിന്നും 120 കിലോമീറ്റര് അകലെയുള്ള ഈ ഗ്രാമത്തില് ഇരുടീമിന്റെയും ആരാധകര് തമ്മില് അക്രമങ്ങള്ക്ക് മുതിരുന്നത് തടയിടാനാണ് പൊലീസിനെ വിന്യസിച്ചിരിക്കുന്നത്. ഫൈനല് നടക്കുമ്പോള് ആളുകള്ക്ക് കൂട്ടം ചേരാനും വലിയ സ്ക്രീനുകളില് പ്രദര്ശനം നടത്താനും അനുമതിയില്ലെന്ന് പ്രദേശത്തെ പൊലീസ് മേധാവി മുഹമ്മദ് അംറാനുല് ഇസ്ലാം എ.എഫ്.പിയോട് പ്രതികരിച്ചു. ബംഗ്ലദേശിലെ പ്രധാന കായിക വിനോദം ക്രിക്കറ്റായി പരിണമിച്ചിട്ടുണ്ടെങ്കിലും കടുത്ത ഫുട്ബാള് ആരാധകരും രാജ്യത്തുണ്ട്. കേരളത്തിലേതിന് സമാനമായി ഫ്ലക്സുകളും പതാകകളും ഗ്രാമത്തില് ഉയര്ന്നിട്ടുണ്ട്.