ലോക്ഡൗണിനെതിരെ ആസ്ട്രേലിയയില് പ്രതിഷേധം
സിഡ്നി: ലോക്ഡൗണ് നിയന്ത്രണങ്ങള്ക്കെതിരെ ആസ്ട്രേലിയയില് കടുത്ത പ്രതിഷേധം. രാജ്യത്ത് സിഡ്നി ഉള്പ്പടെയുള്ള നഗരങ്ങളില് നടന്ന പ്രതിഷേധങ്ങളില് ആയിരക്കണകിന് ആളുകള് പങ്കെടുത്തു. പലയിടത്തും പ്രതിഷേധക്കാരും പൊലീസും തമ്മില് ഏറ്റുമുട്ടി. നിരവധി പേരെ അറസ്റ്റ് ചെയ്യുകയും പിഴ ചുമത്തുകയും ചെയ്തിട്ടുണ്ട്.
കോവിഡ് പ്രതിസന്ധി തുടരുന്ന സാഹചര്യത്തില് മാസ്ക് ധരിക്കാതെയാണ് പ്രതിഷേധക്കാര് സമരത്തില് പങ്കെടുത്തത്. ഫ്രീഡം, ട്രൂത്ത് എന്നിവ എഴുതിയ ബോര്ഡുകളും കൈയ്യിലേന്തിയായിരുന്നു നിരവധിപേരുടെ പ്രകടനം. ജനങ്ങള്ക്ക് ജനാധിപത്യപരമായി പ്രതിഷേധിക്കാന് അവകാശമുണ്ട്. പക്ഷേ ജനങ്ങളുടെ ആരോഗ്യത്തെ ബാധിക്കുന്ന വിധം കൂടിച്ചേര്ന്നതിനാലാണ് നടപടി സ്വീകരിച്ചതെന്ന് ന്യൂ സൗത്ത് വെയില്സ് പൊലീസ് വെളിപ്പെടുത്തി.
കോവിഡ് കേസുകള് വര്ധിച്ചതോടെയാണ് ആസ്ട്രേലിയന് നഗരങ്ങളില് കനത്ത നിയന്ത്രണങ്ങള് ഏര്പ്പെടുത്തിയത്. വലിയൊരു ശതമാനത്തിനും വാക്സിന് ലഭിക്കാത്തത് കൊണ്ടുതന്നെ ജനങ്ങള് പ്രതിഷേധത്തിലാണ്.