![“Manju”](https://santhigirinews.org/wp-content/uploads/2020/04/YOUTUBE.jpg")
അലഹബാദ്: ഭാഷയെ മതവുമായി ബന്ധിപ്പിക്കാനാവില്ലെന്ന് അലഹബാദ് ഹൈക്കോടതി. മുസ്ലിം ജനസംഖ്യ കുറവുള്ള പ്രദേശങ്ങളിലും ഉറുദു പഠിപ്പിക്കാമെന്ന് കോടതി നിരീക്ഷിച്ചു . ജസ്റ്റിസ് അശ്വാനി കുമാര്‍ മിശ്രയുടേതാണ് ഈ നിരീക്ഷണം. ഉറുദു അധ്യാപികയാണ് സ്കൂളില്‍ നിന്ന് പുറത്താക്കിയതിനെതിരെ കോടതിയെ സമീപിച്ചത്. 20 ശതമാനം മുസ്ലിം ജനസംഖ്യയില്ലാത്ത സ്ഥലങ്ങളില്‍ ഉറുദു അധ്യാപക തസ്തിക ആവശ്യമില്ലെന്നായിരുന്നു സര്‍ക്കാര്‍ ഉത്തരവ്. തുടര്‍ന്ന് എയ്ഡഡ് സ്കൂള്‍ അധ്യാപികയായ ഹര്‍ജിക്കാരിയുടെ ജോലി നഷ്ടപെടുകയായിരുന്നു. ഇതിനെതിരെയാണ് അധ്യാപിക കോടതിയെ സമീപിച്ചത്.
മതേതര രാജ്യത്ത് ഇത്തരം നയങ്ങളുണ്ടാവരുതെന്നും കോടതി ചൂണ്ടിക്കാട്ടി . മുസ്ലിം വിഭാഗക്കാര്‍ കുറവുള്ള പ്രദേശങ്ങളിലും ഉറുദു പഠിപ്പിക്കാം. ഇതുമായി ബന്ധപ്പെട്ട് കൂടുതല്‍ വിശദീകരണം നല്‍കാന്‍ സംസ്ഥാന സര്‍ക്കാറിനോട് ആവശ്യപ്പെട്ടു. കേസ് ആഗസ്റ്റ് 16ന് വീണ്ടും പരിഗണിച്ചേക്കും .
