എ പി ജെ അബ്ദുല് കലാം സ്കോളര്ഷിപ്പിന് അപേക്ഷകള് സമര്പ്പിക്കാം
തിരുവനന്തപുരം: സംസ്ഥാന ന്യൂനപക്ഷ ക്ഷേമ വകുപ്പിന്റെ എ പി ജെ അബ്ദുല് കലാം സ്കോളര്ഷിപ്പിന് അപേക്ഷകള് സമര്പിക്കാം. സര്ക്കാര്/ എയ്ഡഡ്/ അംഗീകൃത സ്വാശ്രയ പോളിടെക്നിക്കുകളില് മൂന്നു വര്ഷ ഡിപ്ലോമ കോഴ്സുകളില് പഠിക്കുന്നവര്ക്കും സാമ്പത്തികമായി പിന്നാക്കം നില്ക്കുന്ന കേന്ദ്ര സര്ക്കാര് മത ന്യൂനപക്ഷങ്ങളായി അംഗീകരിച്ച പട്ടികയില് ഉള്പെടുത്തിയിട്ടുള്ള പാഴ്സി, സിഖ്, ക്രിസ്ത്യന്, ബുദ്ധ, മുസ്ലീം, ജൈന വിഭാഗങ്ങളിലെ വിദ്യാര്ഥികള്ക്കും സംസ്ഥാന ന്യൂനപക്ഷ ക്ഷേമ വകുപ്പിന്റെ എ പി ജെ അബ്ദുല് കലാം സ്കോളര്ഷിപ്പിന് അപേക്ഷ നല്കാവുന്നതാണ്.
ഒരു വര്ഷത്തേക്ക് 6,000 രൂപയാണ് സ്കോളര്ഷിപ്പായി ലഭിക്കുന്നത്. കഴിഞ്ഞ വര്ഷം സ്കോളര്ഷിപ്പിന് അപേക്ഷിച്ച് ലഭിച്ചവര് ഈ വര്ഷം അപേക്ഷിക്കേണ്ടതില്ല. ബി പി എല് വിഭാഗത്തില്പ്പെട്ടവര്ക്ക് മുന്ഗണന ലഭിക്കും. ബി പി എല് അപേക്ഷകരുടെ അഭാവത്തില് ന്യൂനപക്ഷ മത വിഭാഗത്തിലെ എട്ട് ലക്ഷം രൂപ വരെ വാര്ഷിക വരുമാനമുള്ള നോണ് ക്രീമിലയര് വിഭാഗത്തിനും അപേക്ഷിക്കാം. രണ്ടാം വര്ഷകാരേയും മൂന്നാം വര്ഷകാരേയും സ്കോളര്ഷിപ്പിനായി പരിഗണിക്കും. ഒറ്റത്തവണ മാത്രമേ സ്കോളര്ഷിപ്പ് ലഭിക്കുകയുള്ളു.
30 ശതമാനം സ്കോളര്ഷിപ്പ് പെണ്കുട്ടികള്ക്കായി സംവരണം ചെയ്തിട്ടുണ്ട്. വിദ്യാര്ഥികളെ തെരഞ്ഞെടുക്കുന്നത് കുടുംബ വാര്ഷിക വരുമാനത്തിന്റെ അടിസ്ഥാനത്തിലായിരിക്കും. അപേക്ഷകര്ക്ക് ഏതെങ്കിലും ദേശസാല്കൃത ബാങ്കില് സ്വന്തം പേരില് അക്കൗണ്ട് ഉണ്ടായിരിക്കണം. www(dot) minoritywelfare(dot)kerala(dot)gov(dot)in ലൂടെ ഓണ്ലൈനായി അപേക്ഷകള് സമര്പിക്കാം.