മസ്കത്ത്: ‘ടൂര് ഓഫ് സലാല’ സൈക്ലിങ് ചാമ്പ്യന്ഷിപ്പിനായി ദോഫാര് ഒരുങ്ങി. ഖരീഫ് സീസണിന് അവസാനംകുറിച്ച് ഒമാന് സൈക്ലിങ് അസോസിയേഷന് സംഘടിപ്പിക്കുന്ന മത്സരം ചൊവ്വാഴ്ച മുതല് വെള്ളിയാഴ്ച വരെയാണ് നടക്കുക.
സാംസ്കാരിക, കായിക, യുവജനകാര്യ മന്ത്രാലയത്തിന്റെകൂടി സഹകരണത്തോടെയുള്ള ചാമ്പ്യന്ഷിപ്പില് 15 ടീമുകളിലായി 150 സൈക്ലിങ് താരങ്ങള് പങ്കെടുക്കും. ടീമുകളില് പത്തെണ്ണം ഒമാനില്നിന്നും അഞ്ചെണ്ണം ജി.സി.സി രാഷ്ട്രങ്ങളില്നിന്നുമാണ്.
ഇന്ന് സംഘാടക കമ്മിറ്റിയുടെ നേതൃത്വത്തില് പങ്കെടുക്കുന്ന ടീമുകളെ ഉള്ക്കൊള്ളിച്ചുള്ള ടെക്നിക്കല് മീറ്റിങ് നടക്കും. ചൊവ്വാഴ്ച രാവിലെ സുല്ത്താന് ഖാബൂസ് യൂത്ത് കോംപ്ലക്സ് ഫോര് കള്ചര് ആന്ഡ് എന്റര്ടെയ്ന്മെന്റിനു മുന്നില് നിന്നാണ് മത്സരം തുടങ്ങുക. അല് നഹ്ദ ടവര് വരെയുള്ള ആറു കിലോമീറ്റര് ദൂരമാണ് മത്സരാര്ഥികള് പിന്നിടുക. പുരാതന തുറമുഖമായ സംഹറത്തില്നിന്ന് മുഖ്സൈല് ബീച്ച് വരെയുള്ള 106 കിലോമീറ്ററാണ് രണ്ടാം ഘട്ടത്തിലുള്ളത്.
അല് ബലീദ് ആര്ക്കിയോളജിക്കല് പാര്ക്കിന് മുന്നില്നിന്ന് ഖൈറൂണ് ഹെരിറ്റി വരെയുള്ള 101 കിലോമീറ്റര് ദൂരമാണ് മൂന്നാം ദിവസം മത്സരാര്ഥികള് പിന്നിടുക. തഖാ കോട്ടക്കു മുന്നില് നിന്നാണ് അവസാന ദിവസമായ വെള്ളിയാഴ്ച മത്സരം ആരംഭിക്കുക. 109 കിലോമീറ്റര് അല് സാദാ സ്പോര്ട്സ് കോംപ്ലക്സിലാണ് മത്സരം നടക്കുക. സമാപന ചടങ്ങും ഇവിടെ നടക്കും. 7785 റിയാലാണ് ചാമ്പ്യന്ഷിപ്പിന്റെ പ്രൈസ്മണിയായി നല്കുക.