കുട്ടികളുടെ വാക്സിനേഷന്: പ്രത്യേക ആക്ഷന്പ്ലാന്
തിരുവനന്തപുരം: സംസ്ഥാനത്തെ 15 മുതല് 18 വയസുവരെയുള്ള കുട്ടികളുടെ വാക്സിനേഷന് വേണ്ടിയുള്ള തയ്യാറെടുപ്പുകള് പുരോഗമിക്കുകയാണെന്ന് ആരോഗ്യമന്ത്രി വീണ ജോര്ജ് കഴിഞ്ഞ ദിവസം അറിയിച്ചിരുന്നു. 15 മുതല് 18 വയസുവരെയുള്ള കുട്ടികളുടെ വാക്സിനേഷന് തിങ്കളാഴ്ച മുതല് ആരംഭിക്കാനിരിക്കെ പ്രത്യേക ആക്ഷന്പ്ലാന് തയാറാക്കി ആരോഗ്യവകുപ്പ്. വകുപ്പുതല, ജില്ലാതല, സംസ്ഥാനതല ചര്ച്ചകള്ക്കൊടുവിലാണ് തീരുമാനം.
കോവാക്സിന് മാത്രമാണ് കുട്ടികള്ക്ക് നല്കുക. ഇതിനായി പ്രത്യേക വാക്സിനേഷന് കേന്ദ്രങ്ങളും സജ്ജമാക്കും. ജനുവരി 10 വരെ ബുധനാഴ്ച ഒഴികെ ഞായറാഴ്ച ഉള്പ്പെടെ എല്ലാ ദിവസവും ജനറല്/ജില്ലാ/താലൂക്ക്/സിഎച്ച്സി എന്നിവിടങ്ങളില് കുട്ടികള്ക്കുള്ള വാക്സിനേഷന് ഉണ്ടായിരിക്കും. കുട്ടികളുടെ വാക്സിനേഷനായി പ്രത്യേക വാക്സിനേഷന് കേന്ദ്രങ്ങള് ഈ ആശുപത്രികളിലുണ്ടാകും.
അതേസമയം ബുധനാഴ്ചയും ഞായറാഴ്ചയും ഒഴികെയുള്ള എല്ലാ ദിവസവും ജനറല്/ജില്ലാ/താലൂക്ക്/സിഎച്ച്സി എന്നിവിടങ്ങളില് 18 വയസിന് മുകളിലുള്ളവര്ക്കായി പ്രത്യേക വാക്സിനേഷന് കേന്ദ്രം ഉണ്ടായിരിക്കുന്നതാണ്. മുതിര്ന്നവരുടെ വാക്സിനേഷന് കേന്ദ്രം തിരിച്ചറിയാനായി നീല നിറത്തിലുള്ള ബോര്ഡും സ്ഥാപിക്കും.