കൗമാരക്കാരുടെ വാക്സിനേഷന് നാളെ ആരംഭിക്കും
തിരുവനന്തപുരം: സംസ്ഥാനത്ത് കൗമാരക്കാരുടെ കൊവിഡ് വാക്സിനേഷന് നാളെ ആരംഭിക്കും. ജനുവരി 10 വരെ ബുധനാഴ്ച ഒഴികെ ഞായറാഴ്ച ഉള്പ്പെടെ എല്ലാ ദിവസവും ജനറല്, ജില്ലാ, താലൂക്ക് ആശുപത്രികളിലും സിഎച്ചിസികളിലും കുട്ടികള്ക്കുള്ള വാക്സിനേഷനുണ്ടായിരിക്കും. എല്ലാ പ്രാഥമിക ആരോഗ്യ കേന്ദ്രങ്ങളിലും കുടുംബാരോഗ്യ കേന്ദ്രങ്ങളിലും ബുധനാഴ്ച ഒഴികെ ഞായറാഴ്ച ഉള്പ്പെടെ നാല് ദിവസങ്ങളില് കുട്ടികളുടെ വാക്സിനേഷന് കേന്ദ്രങ്ങള് പ്രവര്ത്തിക്കും.
കുട്ടികളുടെ പ്രത്യേക വാക്സിനേഷന് കേന്ദ്രങ്ങളില് കൊവാക്സിന് മാത്രമായിരിക്കും വിതരണം ചെയ്യുക. വാക്സിന്റെ ലഭ്യതയനുസരിച്ച് 15 മുതല് 18 വയസുവരെ പ്രായമുള്ള കുട്ടികള്ക്കുള്ള വാക്സിനേഷന് എത്രയും വേഗം പൂര്ത്തിയാക്കാനാണ് സര്ക്കാര് നീക്കം. കുട്ടികളുടെ വാക്സിനേഷന് കേന്ദ്രങ്ങള് പെട്ടന്ന് തിരിച്ചറിയുന്നതിനായി പിങ്ക് നിറത്തിലുള്ള ബോര്ഡ് സ്ഥാപിക്കുന്നതാണ്. സംസ്ഥാനത്ത് വാക്സിനേഷന് അര്ഹരായ, 15നും 18നും ഇടയിലുള്ള 15 ലക്ഷത്തോളം കൗമാരക്കാരാണുള്ളത്.