ആറുമാസമായി പ്രവര്‍ത്തിപ്പിക്കാതിരുന്ന എ.സി ഓണ്‍ ചെയ്തു രണ്ടുവയസ്സുകാരിയ്ക്ക് ദാരുണാന്ത്യം.

ചെന്നൈ: ആറ് മാസമായി പ്രവര്‍ത്തിപ്പിക്കാതിരുന്ന എസിയിലെ ഷോര്‍ട് സര്‍ക്യൂട്ട് കാരണം തീപിടിച്ച്‌ രണ്ട് വയസുകാരിക്ക് ദാരുണാന്ത്യം. ശനിയാഴ്ച വൈകിട്ടോടെയായിരുന്നു സംഭവം. ഭക്ഷണം നല്‍കിയ ശേഷം മൂന്ന് മണിയോടെ മകളെ കിടപ്പുമുറിയില്‍ ഉറക്കികിടത്തിയ ശേഷം സംഗീത മുറിയിലെ എ.സി.യും ഓണ്‍ ചെയ്തിരുന്നു. ഇത് ആറുമാസമായി പ്രവര്‍ത്തിപ്പിക്കാതിരുന്നതായിരുന്നു. കുഞ്ഞിനെ കിടത്തിയതിന് പിന്നാലെ വീടിന് മുന്‍വശത്ത് പൂക്കള്‍ കോര്‍ക്കുന്നത് അടക്കമുള്ള ജോലികള്‍ ചെയ്യുന്നതിനിടെയാണ് മുറിയില്‍ നിന്നും കനത്ത പുക ഉയരുന്നത് സംഗീത കാണുന്നത്.
ഉടന്‍തന്നെ ഇവര്‍ ബഹളംവെച്ച്‌ അയല്‍വാസികളെ വിവരമറിയിച്ചു. എന്നാല്‍ അപ്പോഴേക്കും മുറിയില്‍ തീപടര്‍ന്നിരുന്നു. പിന്നാലെ അഗ്നിരക്ഷാസേനയെത്തി തീ അണച്ചെങ്കിലും കുട്ടിയെ രക്ഷിക്കാനായില്ല. എ.സി.യില്‍നിന്നുണ്ടായ ഷോര്‍ട്ട് സര്‍ക്യൂട്ടാണ് തീപ്പിടിത്തത്തിന് കാരണമായതെന്നാണ് പോലീസ് പറയുന്നത്. എ.സിയില്‍നിന്ന് വളരെ വേഗത്തില്‍ കിടക്കയിലേക്ക് തീപടര്‍ന്നെന്നും പോലീസ് പറഞ്ഞു. സംഭവത്തില്‍ ശങ്കര്‍ നഗര്‍ പോലീസ് കേസെടുത്തിട്ടുണ്ട്.