അന്താരാഷ്ട്ര വിമാന സര്വിസുകള് ഈമാസം 27 മുതല് പുനരാരംഭിക്കുന്ന സാഹചര്യത്തില് ബഹ്റൈനില്നിന്ന് കേരളത്തിലേക്കും തിരിച്ചുമുള്ള വിമാന സര്വിസുകള് എയര് ഇന്ത്യ എക്സ്പ്രസ് പ്രഖ്യാപിച്ചു. തിരുവനന്തപുരം ഒഴികെ എല്ലായിടത്തേക്കും സര്വിസ് പ്രഖ്യാപിച്ചിട്ടുണ്ട്. കേരളത്തിനു പുറത്ത്, മംഗളൂരുവിലേക്കു മാത്രമാണ് എയര് ഇന്ത്യ എക്സ്പ്രസ് സര്വിസ് നടത്തുന്നത്. കൂടുതല് വിമാന സര്വിസുകള് ആരംഭിക്കുന്നതോടെ ടിക്കറ്റ് നിരക്ക് കുറയുമെന്ന പ്രതീക്ഷയിലാണ് യാത്രക്കാര്.
കണ്ണൂരിലേക്കും മംഗളൂരുവിലേക്കും ഞായര്, ചൊവ്വ ദിവസങ്ങളിലായി ആഴ്ചയില് രണ്ടു വീതം സര്വിസാണുള്ളത്. എല്ലാ ചൊവ്വാഴ്ചയും രാവിലെ 10.40ന് കണ്ണൂരിലേക്ക് നേരിട്ട് സര്വിസ് നടത്തും. ഈ വിമാനം പിന്നീട് മംഗളൂരുവിലേക്കു പോകും. ഞായറാഴ്ച കണ്ണൂരിലേക്കുള്ള സര്വിസ് മംഗളൂരു വഴിയായിരിക്കും.